Ohcejoga váldostivra háliidivččii ovddidit mátkeealáhusa gielddas. Jagi 2035 rádjai ulbmilin livčče giesastit miljon euro vearroboađuid jahkásaččat. Mihttomearrin lea maid oččodit Ohcejohkii juobe 2 000 ođđa seaŋgabáikki idjadeami várás.
Olu mediain beaggán fitnodatdoalli, Juhani ”Jussi” Eiramo luksushotealla Ohcejoga girkosiiddas rahpá fas uvssaidis. Hotealla gárvvásmuvai jo jagis 2021 ja diimmá geasi rádjai ráhkkanus čuoččui guorusin Deatnogáttis. Geassit 2023 Eiramo rabai hotealla uvssaid vuosttas geardde.
Vaikko Utsjoki Arctic Resort -hotealla doaibma jorai dáhpaga bealde, de fitnodatdoalli rabai hotealla fas dán geassái. Ulbmilin lea, ahte 13 miljovnna euro máksán hotealla rahpá uvssaidis fas skábmamánu loahpas ja lea dálvvi rabas.
Eiramo oaivvilda, ahte boahttevaš dálvi ii oro šaddamin beare ráhpat, váikko hotealla dálvesesoŋŋa leage leamašan vuovdimassii mannan ođđajagimánu rájes.
– Gávpi lea jorrán hejot, ii ge báiki geasut prográmmabálvalusaid haga. Mo de leaš, de hotealla lea goit rabas dábálaččat boahtte dálvve.
Eiramo ráđđádallá gielddain ja eará guovllu doibmiiguin oažžun dihte prográmmabálvalusaid johtui.
Gieldda váldostivrra linnjema mielde aktivitehtat ja prográmmabálvalusat leat dehálaš oassi riikkaidgaskasaš mátkeealáhusbuktagis ja daid háliiditge dál ovddidit.
Mii luosa sadjái?
Deanu luossabivdogielddus lea čuohcan Ohcejoga mátkeealáhussii garrasit. Luossabivdu leamašan gildojuvvon juo njeallje geasi ja guovllu fitnodatdolliid burssas dat lea dovdon.
Eurohpá guvllolaš ovdánahttinfoanda lea juolludan Ohcejohkii doarjaga, man vehkiin gielda lea beassan suokkardallat molssaeavttuid luossaturismii. Bargu leamašan goit váttis, dasgo Deanu luossa lea nu dovddus ja dan lea váttis časkkit.
Gielddahoavda Päivi Kontio mielde Ohcejohka ferte geahččat boahttevuhtii ja ráhkadit vejolašvuođaid ođđa ealáhusaide. Eiramo fitnodatdoibmii sii eai goit nagot addit fártta.
– Mii geahččalit dahkat hui olu duogáš barggu ja čielggadit, ahte mo sáhtašeimmet oažžut deike eanet prográmmabálvalusaid. Bargu ii leat álki, go mis leat eará instánssat, mat stivrejit gieldda siste dáhpáhuvvi doaimmaid. Leat iešguđet lágat, boazodoallu, sámekultuvra ja vel meahcceguovloláhka, čilge Kontio.
Almmolaš johtolat ii doaimma nu bures Ohcejogas
Okta Ohcejoga mátkeealáhusa stuorámus váttisvuođain lea dat, ahte báikegoddái ii leat nu álki beassat almmolaš johtolagain. Busset eai jođe eaige Finnaira ruvttogirdimat leat doarvái fállun olgoriikalaš mátkkálaččaide.
– Fitnodatdoallit šaddet duođai ráhččat dan ovdii, ahte mátkkálaččat besset deike, dadjá Kontio.
Gieldda ulbmilin leage ovddidit ruvttuid, vai dat bálvalivčče buorebut mátkeealáhusa.
Fitnodatdoalli Jussi Eiramo mielas Suoma ráđđehus ja stáhtaministtar Orpo galggašedje bargat eambbo Lappi mátkeealáhusa doaibmanvejolašvuođaid ovdii.
– Jus Petteri Orpo čerge, de dalle gal Finnairge fertešii smiehttagoahtit oktavuođaid buorideami.
Prográmmabálvalusaid fertešii oažžut jorrat
Eiramo oaivvilda, ahte Ohcejogas galget leat aktivitehtat, mat beroštahttet mátkkálaččaid.
Dálvet dat leat bohccot, čuoigan, mohtorgielkkát, njealjejuvllagat, husky-beatnagat ja oaggun. Geasset fas guolásteapmi, fanastuvrrat ja kanohtat, logahallá Eiramo.
– Mis leat seammalágan áššehasat Ohcejogas go Kakslauttanenis. Doppe gallededje 60 000 olgoriikalačča jahkásaččat ovdal korona. Gal das reahkká Ohcejohkiige, eandalitge jus girdioktavuođat doaibmagohtet, de Ohcejohka gal lea fiinna báiki, čaimmiha Eiramo.
Eiramo lea bargan guhká Lappi mátkeealáhussuorggis ja sus leamašan fitnodat Soađegili Kakslauttanenis badjel 40 jagi. Eiramo boktá máŋgasiin maiddái ruossalas dovdduid. Lappi gearretriekti dubmii albmá jagis 2020 birasrihkkosis jagi evttolaš fáŋgavuhtii.