Soađegilis leat morihan dasa, go nuorat juhket olu energiijajuhkamušaid. Soađegili gieldda buresveadjinraportta jagiin 2022-2023 mielde 16 proseantta gieldda nuorain juhket measta beaivválaččat energiijajuhkamušaid. Dat lea 10 proseanttaovttadaga eanet go muđui Suomas.
Gielddas leatge dahkan álgaga, ahte energiijajuhkosiid eai vuovddáše vuollái 18-jahkásaččaide. Lága mielde energiijajuhkamušaide ii leat ahkerádjá, muhto daid ávžžuhit vuovdit dušše badjel 15-jahkásaččaide.
Nuorat ieža leat fuobmán, ahte energiijajuhkamušat sáhttet dagahit váttisvuođaid dasa, mo nagodit vuodjut áššiide.
– Mis leat olu oahppit, geat juhket mu mielas menddo olu beaivválaččat daid juhkamušaid. Dieđan olbmuid, geat guorahallet leatgo sis konsentrerenváttisvuođat, muhto sáhtán lohkat ahte eai leat. Go geahččá dan meari, man olu šlagget energiijajuhkamušaid, de dat váttisvuođat bohtet das, oaivvilda Soađegili nuoraidstivrra ságadoalli, ámmátallaskuvlla studeanta Paulus Miettinen.
Maiddái 9. luohkálaš Ella Vaara árvala, ahte su ahkásaš nuorat juhket jo eambo energiijajuhkamušaid go árbevirolaš bruvssaid. Son ieš viggá vealtit daid.
Ivdnás energiijajuhkamušaid márkanastet olu ovdamearkka dihte sosiála medias. Vaara mielas danin dát juhkamušat geasuhit máŋgasiid.
– Go oaidná somes ahte earát smáhkejit daid, de šaddá alddánge miella smáhket.
Gávpejas oaidná dárbbu ságastallamii energiijajuhkosiid birra
Gávpejas Antti Penttinen mielde energiijajuhkamušaid vuovdin lea čielgasit lassánan goit su gávppis maŋimuš jagi áigge.
Gieldda buresveadjin- ja čuvgehuslávdegoddi mearridii moadde vahku dassái bovdet Soađegili gávpejasaid fárrui gieldda bargojovkui. Dan ulbmilin lea lasihit ovttasbarggu gieldda doibmiid gaskkas vai basttet eastadit gárrenávdnasiid boastut geavaheami. Bargojoavkkus áigot ságastallat energiijajuhkamušaid oastinahkerájá loktemis 18-jahkái.
Vaikke Suoma biebmolágas eai leat ráddjehusat energiijajuhkamušaid vuovdimii, de gávppit ožžot ieža ráddjet vuovdima ealáhusfriijavuođa vuođul. Máŋggat gávppit leatge ráddjen energiijajuhkosiid vuovdima mánáide. Dakkár čovdosiidda eai sáhte biebmoeiseválddit jietnadit maidige.
Antti Penttinen lea rabas ságastallamii gielddain. Su gávppis leat dán rádjai vuovdán energiijajuhkamušaid badjel 15-jahkásaččaide, nu mo ávžžuhus Suomas lea.
– Lean dan mielas, ahte lea buorre go áššis ságastallojuvvo, eandalitge daid energiijajuhkamušaid fuones beliin.
Maiddái Ruoŧas máŋggat gávppit leat ráddjen nu ahte energiijajuhkamušaid besset oastit dušše badjel 15-jahkásaččat. Makkárge láhka áššis ii leat. Norggasges stuorradikki háliidivččii energiijajuhkamušaid vuovdimii 16-jagi ahkeráji.
Divvun 19.10. dmu 9.35 Paulus Miettinen lea ámmátallaskuvlla ige ámmátskuvlla studeanta.