Lappis lea dán vahkus lieggasut maid dábálaččat. Vuossárgga beaivit lei muhtin báikkiin joba badjelaš 10 lieggaceahki. Dálkediehtaga lágádusa mielde dat lea eahpedábálaš.
Anáris olbmuid mielas orru ártet, go dán muttus golggotmánu ii leat vel diehtuge dálvvis.
– Mu mielas ii leat dál oba čakčage, mu mielas lea dego geassi. Dán jagi boahtá dálvi njuolgga, čakča mis ii oba leatge. Musge leat muorat vel ruonán šiljus ja ehpelmuorasge eai leat vel lasttat gahččan, árvala Irma Turunen.
Maiddái Tahvo Linna imašta dán čavčča dálkkiid, go diibmá su muittu mielde lei dán muttus jo muohta ja galmmas.
– Muittán gal ovdalis áiggis dán lágan liegga čavččaid. Dál geargá ordnet vel šilju jus ii leat geasi áigge astan, dadjala Linna.
Liegga dálkkit buktet maid arvvi
Erenomaš liekkas lei álgovahkus maid earet eará Soađegilis ja Roavvenjárggas. Roavvenjárgga ruovderaŧŧestašuvnnas mihtidedje vuossárgga joba 11,1 lieggaceahki.
Dálkediehtaga lágádusa meteorologa Jaakko Savela muitala, ahte Roavvenjárggas leat ovdalge mihtihan golggotmánus seammalágan temperatuvrraid.
– Roavvenjárgga girdišiljus mihtiduvvui 15.10.2008 beaivvi alímus temperatuvran 11 lieggaceahki.
Sámis áidna báiki, gos leamašan dábálaš temperatuvrrat, lea Eanodat. Gilbbesjávrris lei vuossárgga 4,8 lieggaceahki, mii lea doppe hui dábálaš dán muttus jagi, dadjá Savela.
Dálkediehtaga lágádus einnosta Lappii liegga dálkkiid olles dán vahkkui, vaikko gaskavahku rájes lieggaceahkit vehá njidjetge. Liegga dálkki fárus bohtet maid arvvit.