Dán čavčča leat gávdnan lasi tryffeliid Davvi-Suomas.
Suomen Tryffelinharrastajat ry (Suoma tryffelberošteaddjit rs.) miellahttu Kirsi Saloniemi háliidii čielggadit ovttas Martta nammasaš tryffel-beatnagiin mo dát guobbarat leat leavvan ja nuba gávnnaiga beatnagiin dán divrras guobbara davimusge Sámis.
– Mun gávdnen juo 2023 tryffelguobbariid Roavvenjárggas ja Soađegilis. Dán čavčča fitnen Avvilis, Anáris, Ohcejogas ja Njuorggámis. Tryffel-guobbarat gávdnojedje máŋggain báikkiin ja erenomážit ledjen ilolaš go beana goaivvui guobbariid Suoma ja maid Eurohpá uniovnna davimus báikkis, Njuorggámis.
Kirsi Saloniemi arvala, ahte dát soaitá leat máilmmi davimus báiki, gos leat tryffeliid gávdnan, muhto das ii leat sihkkarvuohta. Dat lea sihkkar, ahte tryffelat leat olu.
Guobbarat leat Davvi-Suomas oppalaččat lastamuoraid ruohttasiin. Beana gávnnai daid moatti minuhtas.
Tryffelat gávdnojedje vuosttas geardde Suomas easkka 2006. Dát gávdnosat ledje Mátta- ja Gaska-Suomas, muhto Davvi-Suomas leat gávdnan tryffeliid easkka moatti jagi áigge.
Italialaš Federica Crisantellas ja su Audrey nammasaš beatnagis leamašan máŋggat ilolaš bottut davi mehciin. Crisante lea ássán Lappis juo jagi ja juo vuosttas meahccetuvrras beana buvttii sutnje tryffeliid.
– Lei duođai buorre, ahte ožžon dáppe Sámis joatkit iežan ráhkis doaimma, nugo tryffeliid ohcama.
Itálias Federica šaddadii tryffel-beatnagiid ja oahpahii daid ohcat guobbariid.
Suomas dovdet dál njeallje sierra tryffelšlája, muhto vejolaččat dat leat eanetge. Tryffeliid ohcamii dárbbašuvvo eanaeaiggáda lohpi.
Lappis gávdnon tryffelguobbaris haddi lea 3 euro ovtta grámmas
Guoppardovdi, dutki Seppo Huhtinen Turku universitehtas lea movttáskan, go tryffelat leat gávdnon ođđa báikkiin. Yle sáddii sutnje gova olles luddejuvvon guobbaris ja son nannii dan rivttes tryffel-guopparin.
Italialaš tryffel lea biebmoberošteaddjiid hersko, mas sáhttá máksit 5 000 euro ovtta kilos.
Suopmelaš tryffela haddi lea uhcit, dat lea birrasiid 3 000 euro kilos. Suopmelaš tryffelat lea smávit go Gaska- ja Mátta-Eurohpá guobbarat. Guobbariid vuvdet dávjá restoráŋŋaide.