Suomas leat áigumin ođasmahttit boazodoallolága. Dálá láhka lea jagis 1990, ja dat lea boarásmuvvan, dadjá eanan- ja vuovdedoalloministeriija virgeolmmoš Anna-Leena Miettinen.
– Ministeriija lea kárten boazodoallodoaibmiin dan, makkár váttisvuođat das leat ja ministeriijas leamaš guokte bargojoavkku čielggadeamen áššiid, ahte mo boazodoallolága galggašii nuppástuhttit.
Okta ášši, man leat guorahallan, lea boazologu geahpedeami ja dan gohcima guoskevaš paragráfaid. Miettinen muitala, ahte ministeriijas leat dutkkadan, mii livčče rivttes vuohki lahkonit ášši. Nubbi stuorát ášši lágaođasmahttimis lea guohtoneatnamiid divššu ja ávkkástallama plánen.
– Dás ferte gávdnat dássedeattu ja bohtosa mii duhtada buohkaid.
Boazodoalloláhkii leat evttoheamen joba sáhku 1 000 euro bohccos, jus boazodoalli dahje bálgosat eai geahpet plána mielde boazologu. Sáhku ulbmilin livčče baldit boazodoalliid čuovvut geahpedanplána. Sáhku sturrodat lea evttohuvvon njiŋŋálaš bohcco johtolatvahátárvvu mielde, mii beaividuvvo jahkásaččat.
Ođasmahttinfidnus leat gullan boazodoallodoaibmiid ja dan bargojoavkkus leat mielde olbmot, geat ovddastit boazodoalliid, degomat vuosttas várreságadoalli Leo Aikio ja áirras Asko Länsman sámedikkis ja doaimmajođiheaddji Anne Ollila Bálgosiid ovttastusas.
– Ságastallan bargojoavkkus leamaš buorre ja mii joatkit čoahkkimastima vel boahtte jagi álggus, vaikko fidnoáigodat galggaige nohkat jo dán jagi loahpas, čilge Miettinen.
Ođasmahttinevttohus manná riikkabeivviide boahtte jagi, muitala Miettinen. Dan ovdal goit evttohus manná vuos cealkinláhkai.
– Cealkámušaid vuođul vel vejolaččat gártat divodit evttohusa. Evttohus boahtá ministeriija neahttasiidduide dasto cealkinláhkai ja das sáhttá gii beare ovttat olmmoš maid fitnat dahkamin cealkámuša.
Ulbmilin lea ahte ođasmahtton láhka boađášii fárpmui 2026 jagi álggus.