Suoločielggi čuoiganguovddážis lei otne hušša, go olgoriikalaš sesoŋŋabargit doamihedje vearrohálddahusa ságaide.
Vearrohálddahus lágida Suoločielggis dán vahkus pop up -vearrobeivviid. Ulbmilin dainna lea álkidahttit olgoriikkalaš sesoŋŋabargiid registrerema. Dilálašvuođas sesoŋŋabargit fidnejit suopmelaš persovnnadovddaldaga ja vearrogoartta. Jus dát váilojit, de bargoaddi ii bastte máksit bálkká olgoriikalaš bargiide.
Dán rádjai davi guovllu sesoŋŋabargit leat šaddan dahkat čuđiid kilomehteriid mátkki registrerema dihte, danne go lagamus vearrodoaimmahat lea dálá dilis Roavvenjárggas.
Maŋŋebárgga ledje turismabargit boahtán Suoločielgái ovdamearkan Pyhätunturi ja Ylläs ráje. Espánnjalaš Albert Dominguez Cros bargá dán dálvve Pyhätunturis hotealla vuostáiváldimis. Son lea duđavaš vearrohálddahusa bálvalussii.
– Lea duohta fiinnis, ahte mii beassat dás lahka fitnat iige dárbbaš vuolgit stuorát gávpogii dego Helssegii dahje Roavvenjárgii. Lea dehálaš oažžut dákkár bálvalusaid birra riikka, maiddái doppe gos eai leat nu olu olbmot, dadjá Dominguez Cros.
Dán rádjai Lappi duottarguovddážiid sesoŋŋabargit leat ožžon vearrohálddahusa bálvalusaid Avvila dahje Gihttela vearrodoaimmahagas. Dál dat ii šat lihkosmuva, das go dáin doaibmabáikkiin bálvalusa lea ožžon čakčamánu álggu rájes dušše gáiddusin.
Anárlaš Wilderness-hotealla ovddidanhoavda Sanna Aikio muitala, ahte sin fitnodagas vearrobeaivái oassálastet sullii 50 bargi. Ovdal dán beaivvi sii leat ferten deavdit neahtas skovi, mainna ohcet vearrogoartta jahkái 2024. Dán skovi deavdin lea eaktun, ahte beassá dikšut áššiidis pop up beaivái, čilge Aikio.
– Dát vearroáššit ja neahttaskoviid deavdin leat máŋgii maiddái midjiide suopmelaččaide maid váddásat. Gal min bargit leat jearahan vaikko makkár gažaldagaid, muitala Aikio.
Doaibma sáhttá joatkkašuvvat boahtte jagi
Dán vahkus vearrodoaimmahat bálvala Suoločielggis golbma beaivvi ja boahtte vahkus dat fas sirdása Ylläsa čuoiganguovddážii. Fálaldat lea bivnnut, dasgo čuovvovaš golmma beaivve áigge vádjit 300 olgoriikalaš bargi fitnet registreremin iežaset Suoločielggis.
Vearrohálddahusa bargi Marja Koskimäki muitala, ahte sii leat bargan geasi rájes lagas ovttasbarggu fitnodagaiguin, mat bálkkáhit olgoriikalaš sesoŋŋabargiid.
-Jahkásaččat mii dáppe Davvi-Suomas registreret sullii 3 600 olbmo. Stuorra oassi leat juo dáppe Suoločielggis, muhto maiddái Ylläsis lagaš beivviid áigge, dadjá Koskimäki.
Olgoriikalaččaid registreremis vástida vuosttas sajis Digi- ja álbmotdiehtolágádus, muhto maiddái Vearrohálddahus sáhttá mieđihit suopmelaš persovnnadovddáldaga vearrogoartta várás. Persovnnadovddaldaga oažžuma eaktun lea dat, ahte vearrohálddahusa bargi deaivvada olgoriikalaš bargiin njunnálagaid ja son identifisere olbmo mátkkoštanáššebáhpáriid vuođul.
Vearrohálddahusas eai vel máhte lohpidit ahte šaddágo dákkár pop up-dáhpáhus vel boahtte jagige.
– Gal dat orro leamen viehka buorre, ja bures lea vuolgán dát galledeapmi johtui. Geahččat dán maŋŋá mat leat bohtosat ja dan maŋŋá mearridat joatkkadoaimmain, dadjá Marja Koskimäki.