Olles Suomas lea dál hui fuones vuodjinsiivu. Maiddái davimus Suomas leat ráhkkanan dasa, ahte vahkoloahpa áigge lea garra dálki ja borga.
Máddin Sápmái boahtán fitnodat álggii dán čavčča fuolahit Anára ja Ohcejoga geainnuin. Vaikko fitnodat lea Pirkanmaa-guovllus eret, de sii geavahit báikkálaččaid agoartabargguin.
Pimara Väyläpalvelut Oy -fitnodagas dadjet, ahte sii leat ráhkkanan vahkuloahpa várás.
– Mii leat vuolitagoartabargiiguin mannan čađa, makkár siivvut leat boahtimen ja de rusttegat leat válmmašin. Dáppe borgá vehá maŋŋeleappos go doppe máddin. Gusto boahttevaš idja ja iđitbeaivi leat dat váddásamosat dáppe davvin, muitala Pimara Väyläpalvelut Oy doaimmajođiheaddji Marko Vasenius.
Vahkolohppii lea lohpiduvvon muohttaga lassin garra biegga, mii váikkuha geaidnofuolaheapmái.
– Garra biegga váttásmahttá blovema, go biekka mielde šáddet njeađgamat. Dat dárkkuha dan, ahte blovemii gollá eanet áigi, dadjá Vasenius.
Sámis lea álkit dilli go Máttá-Suomas
Guhkes gaskat dahket maid hástalusaid Anára ja Ohcejoga guovllu geaidnofuolahanbargguide. Vasenius mielde goittotge geidnofuolaheamis doaibmá birra jándora gohcin ja dasa lassin agoartabargit čuvvot dálkedieđahusa guovddáža dieđuid.
Marko Vasenius oaidná, ahte Sámis lea álkit dilli go Máttá-Suomas.
– Davvin mis lea buoret dillit go máddin. Dán borgga áigge mis leat goittotge buollašat ja dat dahká min barggu álkibun, dadjá Vasenius.
Olles Suomas lea leamašan garra dálki Jari-nammásaš stoarpma dihte. Maŋimus beivviid áigge leat leamašan máŋggat lihkohisvuođat miehtá Suoma. Sullii 9 000 ruovttu 80 sierra gielddas leat šleađgga haga. Šleađgaboatkkat leat váikkuhan maiddái telefonoktavuođaide.