Lappi EJB-guovddáš lea dahkan dárkkistemiid Avvila geaidnofuolahanguovllus dán vahkus. Plovenguovlu olle Vuohčus Njuorggámii. Dárkkistemiid oasil gávnnahedje muhtun váilevašvuođaid.
Lappi EJB-guovddáža geaidnofuolaheami prošeaktahoavda Markku Riipi muitala, ahte sii leat ávžžuhan geaidnofuolaheaddji dárkkistit iežaset doaimmaid.
– Leat bargan guovllus geaidnodárkkistemiid ja daid vuođul leat ávžžuhan geaidnofuolaheaddji buoridit iežas bargovugiid, vai sáhttet beavttálmahttit geaidnofuolaheami, muitala Riipi.
Riipi muitala, ahte eandalitge geaidnoossodat Avvilis davás Anára guvlui lei dárkkisteami áigge heajos ortnegis.
Dárkkistemiin giddejedje fuopmášumi nu gohčoduvvon maŋŋebargguide, maid galgá fuolahit plovema maŋŋá. Ovdamearkka dihte geainnu dássenbargguid ja plovema čorgenbargguid galggašii ejb-guovddáža mielas beavttálmahttit.
– Sii galget smiehtadit ja ovddidit dan vuogi, mo maŋŋebarggut organiserejuvvojit, muitala Riipi.
Riipi muitala, ahte Lappi guovllus lávejit leat garra muohtaborggat dálvit, ja geaidnofuolaheaddjit galget nákcet bargat iežaset fuolahanbargguid.
– Daidda bargovugiide ja daid ovddideapmái galgá giddet fuomášumi.
Avvila ja Anára geaidnofuolaheamis vástida máttasuopmelaš fitnodat Pimara Väyläpalvelut Oy. Fitnodaga ovddasteaddji ii hálidan kommenteret ejb-guovddáža dárkkisteami.