Norgga ealáhusministeriija lea skábmamánu loahpas ovdanbuktán evttohusa turismavearus. Jo guhká plánejuvvon turismavearru guoská idjademiid nu hoteallain, airbnb-visttiin, karávanaleairrain ja astoáiggefatnasiin guossehámmániin. Vearru boađášii guoskat maid kruisenturisttaid.
Nannán-Norgga gielddat ožžot evttohusa mielde mearridit ieža turismavearu atnui váldimis. Vearru lea eanemustá vihtta proseantta idjadeami hattis.
Yle finai Girkonjárggas gulaskuddamin Hurtigruten-támppa mátkkošteaddjiin, maid sii jurddašit vejolaš vearus.
Austrálialaš Chloe Bachelor ii movttáskan gullat plánejuvvon vearus.
– In mun hálit máksit eambo, ii mus leat ruhta. Mus golle visot ruđat jo go bohten deike, boagusta son.
Maiddái frankriikkalaš Sofie Roll jurddaša, ahte go Norggas lea muđuidge divrras, de vearru váttásmahttá Norgii boahtima.
– Frankriikkas mii buohkat diehtit, ahte eallin lea divrras go lea sáhka Norgga birra.
Turismavearru lea goit maid áddehahtti, oaivvilda austrálialaš Dee.
– Dat lea vealttameahttun dálá ekonomalaš dilis, nu dat fal lea. In dieđus iluin dan mávsse, muhto jus háliidan boahtit ruovttoluotta ja vásihit Norgga de áinnas mávssašin, lohká son.
Turismafitnodagat atnet viđa proseantta vearu menddo divrrasin
Girkonjárgga mátkedoaimmahusat ja Mátta-Várjjaga gielda guottihit evttohusa turismavearus, muhto atnet viđa proseantta mávssu menddo divrrasin.
Girkonjárgga guovllu mátkedoibmiid oktasaš Visit Girkonjárgga stivra gieđahalai ášši mannan vahkus. Stivra mearridii evttohit vearu atnui váldima guovllustis.
– Hoteallaidja sáhttá leat 2 000 ruvnnu, de dat lea stuorra supmi. Mii sáhttit dáppe Mátta-Várjjagis váldit vaikke ovtta proseantta, mii leat ságastallamin áššis, muitala Booking Kirkenes -fitnodaga oamasteaddji Monika Raab.
Vearu ulbmilin lea ruhtadit almmolaš bálvalusaid, dego bálgáid fuolaheami, luniid čoaggima, dieđiheami ja hivssegiid ordnema. Na dat máksu livččii ávkin sihke turismii ja báikkálaččaide.
– Lea buorre jurdda váldit vearu turisttain, go sii goitge dárbbašit dan infrastruktuvrra. Turismavearru lea maid dábálaš ášši miehtá máilmmi, lohká Monika Raab.
Láhkaevttohusas oažžu dál cealkit ja dan maŋŋá dat ovdanbuktojuvvo Norgga Stuorradikkis.
Suomas maid leamašan sáhka turismavearus
Maiddái Suoma bealde bivnnuhis turismaguovlluin, dego Anáris ja Roavvenjárggas, leat ságastallan mátkkošteaddjimávssu nappo turismavearu atnui váldimis.
Anár gielda guottiha turismavearu iskama ja livččii gearggus álgit pilohtagieldan. Gielda lea ságastallan áššis maid stáhtaministtar Petteri Orpoin.
– Ja namalassii nu, ahte ruđat máhcahuvvojit gildii vai bastit fuolahit infrastruktuvrras, blovet geainnuid, ovddidit luniid čoaggima ja ovddidit turismabálvalusaid, lohká Anára gielddahoavda Tommi Kasurinen.
Suoma bealde ii leat goittotge leamašan vel sáhka das, man sturrosaš vearru dahje máksu boađášii leat iige vel diehtu dasge, goas piloteremiin beasašedje álgit.
– Mii hálidivččiimet goit álggahit dán piloterema nu jođánit go vejolaš ja rádjat dasto daid oahpuid, maid leat gázzan das.