Taʹnni eeʹjj EtnoEmma -ciistâst ǩeâsttââll vuõssvuâra še kaʹrjjlaž da sääʹm musikkhaʹŋǩǩõs, Kaʹrjjlest Saaʹmi jânnmid (lä. Karjalasta kolttien maille). Emma Gaala õlmstõõʹtti võboršeeʹǩǩees täʹbbe 12.12.2024.
Emma Gaala lij lääʹdd musikkpuuʹtʼteeʹji juõʹǩǩekksaž gaala, koʹst päʹlǩǩeet musikksueʹrj oummid da jooukid. Tät lij vuõssmõs vuârr, ko EtnoEmma-võboršeʹǩǩen lij še nuõrttsääʹmǩiõllsaž musikk.
Kaʹrjjlest Saaʹmi jânnmid -haʹŋǩǩõõzz musiikkâr Anna Lumikivi rämmaš võboršeǩvuõđâst.
– Jiõm ni võl vueiʹt åskkad. Leäi šiõǥǥ oođâs da možât tät lij näkkam õõut vuâra jieʹllmest ǩiččlâsttmõš, što peäss tok Emma-gaalaaʹje, särnn Lumikivi.
Haʹŋǩǩõs lij pohttam ouʹdde nuʹtt saaʹmi ko še kaʹrjjlai musikkäʹrbbvuõđ. Jooukâst õlmstõõvi skamm-mannust album da haʹŋǩǩõõzzâst lie riâššâm šõddmõõžžid ǩiõlâst di ǩiõtt-tuâjain.
Lumikivi miõlâst lij vääžnai, što kueiʹt minoriteʹttjoouk musikkäʹrbbvuõđ lie pâjjnam lääʹdd musikksueʹrjest.
– Joordam tõn nuʹtt, što tõʹst lij šuurab miârktõs pukid kaʹrjjlaid da saaʹmid ko mij tuâjj-jouʹǩǩe. Sääʹmǩiõllsaž da kaʹrjjelǩiõllsaž musiikk päiʹǩǩ lij juõʹǩǩ pääiʹǩest. Jeäʹla pääiʹǩ, koozz täk ǩiõl jie kuulče, smeâtt Lumikivi.
Sääʹmest EtnoEmma-võboršeʹǩǩen lie leämmaž toouʹni še Ulda, Ánnámáret di Solju.