Suoma, Ruoŧa ja Norgga sámedikkiin eai leat áibbas oktageardánis čoahkkináššit, go sii čoahkkanit guovtti beaivái Helssegii. Norgga Sámedikki dievasčoahkkinjođiheaddji Tom Sottinen bovdii Suoma ja Ruoŧa sámedikkiid ovddasteaddjiid beavddi birra ságastallat guđege riikka dilis.
Sottisa mielde deaivvadeami jurddan ii leat ásahit oktasaš eavttuid jienastusloguide, muhto baicce ságastallat guđege riikka dilis.
– Mii galgat ságastallat das, makkár vejolašvuođat mis leat ovttasbargat buorebut jienastusloguid hálddašeamis, muitala Sottinen NRK Sápmái.
Čoahkkin lea boađus Norgga Sámedikki dievasčoahkkima mearrádusas, man mielde sámedikkiid gulahallama galgá nannet jienastuslogu hálddašeami olis. Álmmolaš ságastallan válgalogahallanáššiin lea gevvojuvvon dáid guhtaliid erenomážit Norgga bealde.
Ságastallamat válgalogahallamiin leat šaddan áigeguovdilin
Maiddái Suoma Sámedikki ságadoalli Pirita Näkkäläjärvi oaidná sámedikkiid ovttasbarggu áigeguovdilin.
– Juohke riikkas lea dál hui áigeguovdilis ságastallan válgalogahallamiid birra ja eandalit das, makkár eavttuiguin dohko oažžu ohcat ja mo válgalogahallamiid ohcamušaid gieđahallan doaibmá, Näkkäläjärvi lohká.
Ruoŧa bealde boahtte giđa sámediggeválggat leat boađi boađi ja Suoma bealde fas lea jođus sámediggelága ođasmahttin. Näkkäläjärvi oaidnáge dehálažžan beassat ságastallat válgalogahallama kriterain ja válgalogahallamiid lágideamis.
– Loahpaloahpas dás lea gažaldat das, mo mii suddjet sámedikkiid legitimitehta válgalogahallanproseassa bokte. Miihan hálidit sihkkarastit, ahte Sámedikkit leat sápmelaččaid jietna nu mo lea sohppojuvvon.
Näkkäläjärvi mielas lea maiddái buorre, ahte sii besset dál gullat guđege riikka dilis njuolga sámedikkiid ovddasteaddjiiguin.
Maiddái Norgga Sámedikki dievasčoahkkinjođiheaddji Tom Sottinen oaidná davviriikalaš ovttasbarggu dehálažžan sámedikkiid doalaheamis sápmelaččaid oktasaš jietnan eanetloguálbmogiid servodagain.