Lappis doaibmi Aslak-gádjunhelikoptera boahtteáigi lea eahpesihkar. Dálá dilis gádjunhelikopter lea vel gearggus girdilit heađálaččaid ja bártidan olbmuid veahkkin, muhto boahttevuođas doaimma várás ii oro šat gávdnomin ruhta.
Dálá dilis gádjunhelikoptera doaimma jođiha doarjjaovttastus. Ovttastusa doaimmajođiheaddji Heikki Lindberg muitala, ahte gádjungirdimat soitet nohkat boahtte jagi ruhtavátnivuođa geažil.
– Mii eat sáhte šat girdit boahtte giđa, jus eat gávnna juoga nu lágán čovdosa áššái, dadjá Lindberg.
Gádjunhelikopteriin, mii gohcá Soađegilis, leat beassan johtilit maid báikkiide, gosa lea muđui váttis beassat.
– Aslak gádjunhelikoptera dehálamos bargu lea doarjut Lappi gádjunlágádusa gádjunbargguin, maid heahteguovddáš sidjiide addá. Dábálaččat dat leat leamašan earret eará evakueremat meahcis ja čáskadit eanabuollimiid, muitala Lindberg.
Gádjunhelikopter Aslak doaimma leat ruhtadan searvvi bokte ovdamearkka dihte doarjjabuktagiid vuovdimiin. Dasa lassin stáhta lea sierramearreruđain máksán searvái girdindiimmuid mielde.
Lappis lea Aslak lassin maid doavttirhelikopter ja rádjegohcinlágádusa helikopter, muhto liikká Aslak heaittiheapmi váttásmahtášii gádjundoaimma davvin oaivvilda Lindberg.
–100–150 diimmu helikoptera girdindiimmut báhcet de muhtin eará operáhtorii ja eanaovttadagaid geavaheami šaddá lasihit, jus Aslak ii bastte doaibmat. Dat diehtá lasi goluid, hástalusaid ja ájáhusaid, dadjá Heikki Lindberg.
Gádjunlágádus fuolas, jus Aslaka doaibma nohká
Eanemusat gádjunhelikoptera barggahit vánddardeaddjit, geat leat bártašuvvan guhkás meahccái ja gosa lea váttis beassat. Dasa lassin gádjunhelikopter veahkeha maiddái čáskkadit eanabuollimiid.
Gádjunhoavda Markus Aarto muitala šleađgaboastta bokte, ahte jus Aslak gádjunhelikoptera doaibma nohká, de veahki oažžun meahccái ádjána guhkkit.
– Boahttevuođas seamma bargguid fuolahit mohtorgielkkáiguin ja njealjejuvllagiiguin, dadjá Aarto.
Buot hohpoleamos áiggit Aslakii leat eandalitge giđđadálvi, čakčageassi ja čakča. Dalle olbmot johtet eanemus luonddus.
Stuorámus fuolla gádjunlágádussii lea dat, ahte mo resurssat reahkkájit, go turismaealáhus stuorru ja álbmotmehciin johtet ain eanet olbmot.
– Dan geažil Aslak helikoptera veahkki leamašange hui dárbbašlaš gádjunlágádussii, dadjá Aarto.
Mohkkás ruhtadeapmi
Aslak gádjunhelikoptera ruhtaváttisvuođat ja ruhtadeapmi leat mohkkás áššit. Doarjjaovttastus ii háhpohala vuoittu, muhto dat oažžu ruđa máŋgga eará gáldus. Dál dat ruhtagáldut leat goit coahkumin.
Ruđa geahččalit čoaggit earret eará telefonvuovdima bokte, muhto dat ii buvtte ruđa šat seamma láhkai go ovdal. Sivvan dasa lea, ahte suopmelaččat eai šat golat nu olu, diehtá Lindberg.
Lindberg muitala, ahte ovttastusa jahkebušeahtta lea birrasiid golbma miljovnna euro. Boahtte jahkái ovttastusas lea 400 000 euro vuolláibáza.
Lindberg mielas buoremus molssaeaktu livččii dat, ahte ruđaid eai dárbbašivčče čoaggit ollenge.
– Jus min doaibma ruhtaduvvošii oalát almmolaš ruđain, de min jahkebušeahtta unnošii mearkkašahtti olu, čilge Lindberg.
Sisministeriija ii šat mávsse seamma olu go ovdal
Ovttastus bearrá helikoptera goluid sisministeriijas.
Sisministeriija gádjundárkkisteaddji Tommi Luhtaniemi muitala, ahte dán jagi helikoptera gádjundoaimmaid goluid leat buhtadan birrasiid 295 000 euroin.
Gádjunlágádusa ja ovttastusa mielde ruhtakriisa sivvan lea dat, ahte sisministeriija lea čavgen ruhtadeami eavttuid. Ruđat máksojuvvojit sierramearreruđain.
Ministeriija lea diimmáža rájes dulkogoahtán rehkegiid eará láhkai go ovdal. Luhtaniemi mielde sii leat fuobmán, ahte oassi Aslaka rehkegiin leat dakkárat, maid ii sáhte gokčat sierramearreruđain.
– Ovdamearkka dihte lápmašuvvamat ja buohccidivššu fievrredeami golut eai gula dán mearreruđa ulbmiliidda, muitala Luhtaniemi.
Sisministeriija mielde dákkár goluid galggašii máksit buresveadjinguovllu burssas.
Buresveadjinguovllus ja gádjunhelikopteris moalkás oktavuohta
Lappi buresveadjinguovllu ja Aslaka doarjjaovttastusa oktavuohta lea moalkái.
Buresveadjinguovllu vuollásaš gádjunlágádus bearrá ovttastusas 150 000 euro jagis das, go helikopter geavaha sin gádjunbargiid. Gádjunlágádusa hoavda Markus Aarto ii leat goit gearggus luohpat dán ruđas, vaikko son leage fuolas gádjunhelikoptera doaimma boahtteáiggis.
– Dat oaivvilda, ahte gearggusvuođa ferte čuohppat gos nu eará sajis, dadjá Aarto.
Lappi buresveadjinguovllu beavddi alde lei dán vahkus evttohus Aslak gádjunhelikoptera ruhtadeamis. Evttohus goittotge gopmánii, iige doppege goaikkehan lassiruhta.
Dálá dilis buresveadjinguovllus lea iežas helikopter buhcciid fievrredeapmái. Dan mielde johtet maid divššárat. Doavttirhelikopterii čoggojedje diibmá birrasiid 400 girdindiimmu, mii lea measta njealjegeardásaš lohku Aslaka ektui.
Veahki gádjundoaimmaide sáhtte oažžut maiddái rádjegohcinlágádusa helikopteris ja maiddái Norggas.
Aslak gádjunhelikoptera boahtteáigi leamašan máŋgii ovdalge áitaga vuolde. Jáhkku doaimma boahtteáigái lea goit ain nanus.
Lappi gádjunlágádusa bajitbuollinčaskkadeaddji Ville Koskela bargá Aslak gádjunhelikopteris gádjundoaimmain. Su mielas doaimma nohkan livččii stuorra dáhpa.
– Buot báikkiide ii oba beasage eatnama mielde, dan veardde viiddis eatnamat dáppe leat, dadjá Koskela.