Anára Suoločielgái čoahkkanit Eurohpá njunuš politihkkárat ja sin joavkkut dán vahkuloahpa North-South Summit -čoahkkimii. Dan lágida Suoma stáhtaministtar Petteri Orpo.
Čoahkkimii oassálastet Itália stáhtaministtar Giorgia Melon, Greikká stáhtaministtar Kyriákos Mitsotákis, Ruoŧa stáhtaministtar Ulf Kristersson ja maiddái EU olgoáššiid ja dorvopolitihka alla dási ovddasteaddji Kaja Kallas.
Dán čoahkkimis gieđahallet earret eará Eurohpá dorvvolašvuođa, bealušteami, ráhkkaneami ja sisafárrema.
Stáhtaministtar Petteri Orpo lea háliidan buktit čoahkkima Suoločielgái, go háliida čájehit mo lea dáppe davvin.
Su mielas lea dehálaš oaidnit dan, go lea sáhka Eurohpá ja Suoma dorvvolašvuođas. Guhkes gaskkat, dálki ja nuortarádjá mielddisbuktet iešguđetlágan hástalusaid.
Ain dávjjit háliidit ordnet alla dási čoahkkimiid davvin
Suoločielggis lea ovdalge ordnen sullasaš alla dási čoahkkimiid. Ovdamearkka dihte jahki dassái Eurohpá guovddášbáŋkku ráđđi čoahkkanii Suoločielggis.
Anára gielddajođiheaddji Tommi Kasurinen lea movttet das, go dakkár čoahkkimiid ordnejit doppe.
– Suoločielggis leat guhkes árbevierut ordnet dakkár riikkaidgaskasaš čoahkkimiid. Mis lea sadji ja čehppodat lágidit dakkáriid ja idjadansajit maiddái leat doarvái, lohká Kasurinen.
Báikkálaš fitnodatdoalli Uule-Niiles Sara lea guossohan máŋgii alla dási politihkkáriid iežas boazofitnodagastis. Dán North-South Summit -čoahkkima olis eai leat goittot váldán sutnje oktavuođa.
Sara mielas lea ávkkálaš, go dakkáriid ordnejit Suoločielggis.
– Dat gal lea dieđusge dieinna lágiin buorre, ahte boahtá guovlu eambbo oidnosii. In dieđe oidnogo dat muđui gal dál. Dáppe leat nu olu turisttat muđui nai. Juohke hotealla ja turistabáiki lea áibbas dievva, muitala son.