Juovllaid áigge lávejit čoaggit ruđa ja skeaŋkkaid iešguđetlágan vugiiguin bearrašiidda, geat eai muđui suittášii oastit biepmu dahje máksit rehkegiid.
Sii geain lea vánis ruhta dárbbašit veahki birra jagi, eai dušše beare juovllaid áigge, muittuha Eanodaga searvegotti diakoniabargi Sointu Jokiniemi.
– Juovllaid maŋŋá eallin joatkašuvvá.
Ollislaččat mánnábearrašiid geafivuohta lea lassánan Suomas maŋimuš áiggiid. Ollu dákkár bearrašat leat maiddái Ohcejogas ja Eanodagas.
Ohcejogas gieldda mánáin njealátoassi eallá ruhtavánis. Ohcejogas dát guoskkaha 41 máná. Geafivuohta lea lassánan gielddas measta 7 proseantaovttadaga jagiid 2010 ja 2023 gaskka.
Maiddái Eanodagas viđádas nappo 49 máná ellet bearrašiin, main lea ruhtavátni. Mánnábearrašiid geafivuohta lea ollislaččat goittotge geahppánan gielddas measta 8 proseantta jagi 2010 ektui.
Olles Suoma dásis sullii 12,2 proseantta mánáin ellet geafivuođas. Dat lea badjelaš 123 000 máná.
Anáris ja Soađegilis mánnábearrašiid birgenláhki lea buoret riikkadási ektui.
Eanodagas ja Ohcejogas searvegottit háhket bearrašiidda ruđa ja skeaŋkakoarttaid
Searvegottit geahččalit veahkehit ruhtavánis ealli bearrašiid diakoniabarggu bokte. Eanodaga searvegoddi lea mielde earret eará riikkaviidosaš Juovlamuorra-ruhtačoaggimis.
Eanodagas leamašan maiddái Jouluiloa Enontekiön kuntalaisille -čoaggin, masa ovttaskas olbmot leat skeŋken skeaŋkakoarttaid. Koartta árvu leamašan eanemustá 50 euro vai dat ii váikkuhivčče eará doarjagiidda maid olmmoš oažžu.
– Dán jagi ruhta čoggui eanet go diibmá, badjel 5 000 euro. Mii leat buriin mielain juohkimin dieid juovladearvvuođaid olbmuide geat dárbbašit veahki, dadjá Jokiniemi.
Skeaŋkakoarttaiguin sáhttá oastit biebmu ja eará dábálaš ruoktogálvvuid.
Suoma heajos ekonomalaš dilli vuhtto maiddái Sámi mánnábearrašiin.
– Geavahanhattit leat loktanan, muhto ealáhagat ja bálkkát eai leat seamma dásis lassánan. Dat váikkuha dasa, ahte olbmuin lea váttisvuohta ruhtadiliin ja máksit rehkegiid, Jokiniemi lohká.
Maiddái Ohcejogas searvegoddi lea geahččalan veahkehit bearrašiid. Ohcejoga searvegotti diakoniabargi Riikkaliisa Joentausta muitala, ahte searvegoddi lea dáid juovllaid juohkán earret eará 25 biebmobáhka ja sullii 100 iešguđetlágan skeaŋkakoartta. Dasa lassin searvegoddi lea juohkán maiddái ullosuohkuid.
Ohcejogas bearrašat leat rávkan searvegottis ovdamearkka dihte ruđalaš veahki. Dasa lassin muhtimat leat dárbbašan veahki rehkegiid máksimii vai bearaš sáhttá oastit biepmu juovllaide.
– Olbmot dáppe leat hui iešheanalaččat ja danin lea hui váttis fáhtet daid olbmuid, geat dárbbašit veahki, muitala Joentausta.