Rosttovmannust Lääʹddjânnam ortodookslaž ceerkav pââimõs jååʹđteei vaajteš pâʹjjel 20 eeʹjj kõõsk mâŋŋa. Aaʹrhelpiisp Elia, siviilnõmm Elia Wallgrén (ouddlõs Matti Wallgrén), alttummuš ođđ tuâjast miârkkšõõvi tiudd kaʹlndaar da kaaunõõttmõõžžid.
Ouddâl eeʹjjvaajtõõzz aaʹrhelpispp õõlǥi seʹrdded obb jieʹllem Oulust Heʹlssna, koʹst aaʹrhelpispp jååʹđat Lääʹddjânnam ortodookslaž ceerkav.
Siirdčõõttmõš Tâʹvv-Lääʹddjânnmest vueiʹvvgååradvoudda lij Eliaaʹje leämmaž jõnn läuʹǩǩ. Tââʹv ceerkvallaš jieʹllem ouddnummuš lij leämmaž suʹnne vääžnai – mâʹte še sääʹmääʹšš. Saaʹmi rool son haaʹleʹči viikkâd ooudâs ceerkvest.
– Miʹjjid lij čâđđam äʹšš viikkâd saaʹmid mieʹldd aivv pââimõs tässa ceerkvest, särnn ođđ aaʹrhelpispp Elia.
Oouʹdab aaʹrhelpispp Leo tuʹmmji kueʹđđed jiijjâs ortodookslaž karriääʹr pâʹjjel 45 eeʹjj mâŋŋa. Tän ääiʹjest maaiʹlm lij mottjam čuuʹt. Aaʹrhelpisppân suu toobdât minoriteeʹtti, jeäʹrben saaʹmi di kaʹrjjlai vuõiggâdvuõđi peälšteeʹjen.
Son leäi mieʹldd ooudâs viikkmen sääʹmǩiõllsaž materiaali tuejjummuž ortodookslaž ceerkvest da jooʹđi jiânnai saaʹmi kõõskâst.
– Vueiʹnnem, toʹbddem da ǩiččlõʹsttem jiõčč nuõrttsääʹmǩiõl vaiggâdvuõđid. Ääʹšš mottje meälǥžet. Minoriteeʹtti aaʹšši teevvmõš maaiʹlmest lij rââʹžžes sââʹjest. Puk minoriteeʹtt ǩeâll'je, ko sij lie occanj, smeâtt Leo.
Saaʹmi ceerkavsåbbar eʹtkkõs õinn ǩiõtt'tõõllâm vueʹlnn
Sääʹm vuåǯǯu jiijjâz oudsteei ortodookslaž ceerkavsåbbra juʹn kutt eeʹjj mââiårra, eeʹjjest 2019. Kuuitâǥ lääʹjjvaajtõs lij välddam jiânnai ääiʹj da äʹšš lij õinn ǩiõttʼtõõllâm vueʹlnn. Sääʹm jie piâssâm mieʹldd jiõnsted ođđ aaʹrhelpiispâst skamm-mannust.
Tän ääʹšš ođđ aaʹrhelpispp haaʹlad teevvad nuʹtt puârast ko vueiʹtlvaž.
– Leäʹp tuejjeeškuättam lääʹjjmuttsid juʹn mäŋgg eeʹjj mââiårra, leâša tõk väʹldde miâlggâd jiânnai ääiʹj. Låʹppääm tuejjeed puk tõn ouʹdde, što saaʹmin leʹčči aivv juõʹǩǩ tääʹzzest jiijjâz oudsteei ceerkvest seäʹbrrkooʹddin ceerkavsåbbra, särnn Elia.
Lääʹjjvaajtõʹsse taarbšet määŋgin instaansin jiijjâz vuäinalm ceerkav seʹst, håʹt-i poliittlaž tuʹmmstõk lij juʹn tuejjuum. Oouʹdab aaʹrhelpispp Leo åskk, što minoriteeʹtti ääʹšš kaiʹbbje jeänab di jeänab tååimaid ceerkav seʹst. Son õõmtââšš, mäʹhtt saaʹmi eʹtǩǩeem äʹšš iʹlla ouddnam.
– Mõõn-ne diõtt tät saaʹmi eʹtǩǩõs lij pääccam kõõskräjja. Tuäivam, što tõn vuäǯǯat jåʹttlânji valmmšen, särnn Leo.
Aaʹrhelpiispâst jõnn rooll õhttsažkååʹddest
Aaʹrhelpispp Elia haaʹlad juäʹtǩǩed seämmanallšem čuõkku âʹlnn ko oouʹdab aaʹrhelpispp Leo. Minoriteeʹtti, mâʹte säʹmmlai, aaʹššid âlgg ravveed še Lääʹddjânnam õhttsažkååʹddest.
Aaʹrhelpiispâst lij jõnn rooll da Elia haaʹlad ââʹnned tõn še säʹmmlai pueʹrren. Aaʹrhelpiispâst lie veiddsõs säimmõõzz Lääʹddjânnam poliittlaž tuʹmmjeeʹjid da ministeriaid.
Eliaaʹje lie vääžnai nuʹtt koččum ruânn äärv, kooi peäʹlest son äigg mainsted ǩeeʹjjmieʹldd jieʹllem. Õhttân ouddmiârkkân son vuäinn aarktlaž vuuʹd da tõn jieʹllemvuäittmõõžži oouʹdummuž.
– Luâđ varjjlummuž da jieʹllemvuõʹjji seillmõõžž peäʹlest ääiǥam mainsted. Minoriteʹttǩiõli, mâʹte sääʹmǩiõl, tuärjjummuš lij vääžnai. Ouddmiârkkân ââʹn leäʹp jåårǥlâʹttmen sääʹmǩiõllsaž Biblia. Mij haaʹleep tuärjjeed mij minoriteeʹttid, saaʹmid, vuäinn Elia.
Teevvum 14.1.2025 čiâss: Aaʹrhelpiisp nõõm tivvum Elia Walgrénen, kååʹtt lij suu ânnʼjõž siviilnõmm. Ouddlõs nõõmâs leäi Matti Walgrén, ij Markku, mâʹte ouddâl ǩeeʹrjtim.