Davvi-Norggas leat máŋggat geainnut gitta muohtauđasvára ja garra dálkki dihte. Birrasiid 6 000 olbmo fertejit dál duhtat bissut ruovttuin, go geainnut leat gitta. Áššis muitala NRK.
Dát guoská earret eará Áváhkái, Ávanuorrái ja Gilivutnii. Sáččás Romssas maid leat máŋga giláža geainnu haga.
Suoma dálkedutkanlágádusa meteorologa Juuso Paajanen muitala, ahte Davvi-Norggas lea dál earenomáš stuorra muohtauđas riskka. Maiddái Gilbbesjávrris ja Giehtaruohttasis uđasdilli lea dál várálaš.
Giehtaruohttasis lea dálá dilis lagabui mehter muohta, go eará guovlluin Lappis lea dušše birrasiid 50 sentte.
– Gilbbesjávrris ja Davvi-Norggas muohttá otne ja vel bivalda. Dasa lassin garra biekka dihtii maid joavgá, de dat maid lasiha uđas riskka, čilge Paajanen.
Stuorámus muohtauđasriskka lea eandalitge luonddudilát vilttiin ja váriin, mat beroštahttet earenomážit friijačierasteaddjiid čierastit.
Vuolleleappos sáhttá leat aivve earálágan dálki, go badjin váris
Badjeolmmoš Nils-Matti Vasara muittuha, ahte Giehtagierraga duoddarat leat árvitmeahttumat. Son gal ii ávžžut geange dál vuolgit duoddariidda garra dálkkis.
– Ávžžuhan gal bissut geainnu alde dál, go dálki vel hedjona. Boazobargit gal dovdet dieid báikkiid, sii eai mana dieidda. Muhto luondduoahpisteaddjiskuvlejumiin gal ii birge diekkár dálkkis. Dat olbmot ja turistat mat golget iehčanassii, sidjiide dat lea váralaš, dadjá Vasara.
Vasara diehtá ja dovdá bures daid duottarguovlluid, main uđđasat lávejit mannat. Son gal ii leat oktiige gártan muohtauđđasii, muhto lea gal oaidnán, go uđas vuolgá johtui.
Vasara muitala, ahte dán muttus jagi eai vel leat friijačierasteaddjit jođus Giehtagierraga duoddariin. Son goit deattuha, ahte vuolleleappos sáhttá leat aivve earálágan dálki, go badjin váris.
– Duoddaris sáhttá leat olu garrasut biegga, go maid dálkediehttit einnostit, fuomášuhttá Vasara.
Hárjánan badjeolmmoš ii goit láve dálkkis ballat. Go fal fievru doaibmá, de gal ii leat heahti.
– Ii mus leat gal go coca-cola mielde. Dat lea áidna jus bártida skohteriin, ahte ii beasa eret. Doppe muđuid gal boahtá eret. Ii nu garra dálki gal boađe, dadjá Nils-Matti Vasara.