Čáhkáljávrri gáddái mannet dievva turisttat Gilbbesjávrris. Sii ohcet muohttat vuolde mystihkalaš fatnasa, mii orru sosiála media vuođul dat báiki, gos oažžu buoremus gova.
Moadde jagi dassái govva Čáhkáljávrri gáddái báhcán dološ, goasii mieskan fatnasis leavvagođii Instagramas. Dat lea fiinna muoras dahkkon fanas, man duohken oidno Sáná ja danin lea fiinnis somegovain.
Seamma áigge go fanas čokkii duháhiid mielde reakšuvnnaid Instagramas, dutki Elina Hutton lei čállimin nákkosgirjji sosiála media váikkuhusas Giehtaruohttasa turismii.
– Sosiála media lokte oalle johtilitge dakkár báikkiid, gosa buohkat nu mo de lávejit dadjat, galget beassat. Dat sáhttet leat dakkár báikkit, gosa turisttat eai rievttimielde dárbbaš beassat, lohká Hutton.
Hutton dutkkai nákkosgirjjis várás duháhiid Gilbbesjávrris váldon govaid ja govvateavsttaid. Boađusin lei, ahte mátkkálaččat vajáldahttet dan birrasa, go váldet buriid govaid.
– Váttisvuohtan lea dat, ahte dán fatnasa luhte ii leat makkárge bálggis ja dan biras lea dološmuitoguovlu, mii ii leat oba dutkojuvvon albma láhkai. Eana fatnasa birra lea dulbmojuvvon ja šattut muohttat vuolde leat jápmán.
Máŋgasat ohcet somes inspirašuvnna eaige ádde heajos beliid
Dán áigge turisttat válljejit ja ohcet luopmobáikkiid fiinna somegovain. Turisttat hárve jurddašit, ahte somes čájehuvvon muhtin mystihkalaš báikái ii rievttimielde livčče lohpi mannat.
Geahča videos, mo somegovat váikkuhit mátkkálaččaid válljejumiide:
Hutton muitala, ahte somealmmuheamit normaliserejit eahpeehtalaš láhttema ja njuolggadusaid rihkkuma. Ovdamearkka dihte Roavvenjárggas leat hehtten báikkálaččaid ruovtturáfi, go leat ihku ohcan guovssahasaid.
– Olbmuide šaddá dakkár govva, ahte buohkat dahket ná. Ahte lea áibbas ok mannat gosa nu, vaikke livččii priváhta dahje suodjaluvvon guovlu, dahje vaikke livččii váralaš.
Dievaslaš báikki ohcan somegova várás vuhtto maid gádjundoaimmain, go miehtá máilmmi muitalit juobe jápmima dagahan bárttiin, maidda turisttat leat šaddan govvedettiin juoidá.
Gilbbesjávrris váiban turisttaid leat gártan viežžat eret duoddaris. Sivvan árvalitge namalassii sosiála media.
– Somealmmuhemiin rábmojit dávjá vaikkeba moatte beaivve vánddardantuvrra Giehtaruohttasis. Dat sáhttet movttiidahttit olbmuid iskat seammalágan tuvrraid, vaikke sis ii leat vásáhus vánddardeamis, oaivvilda Hutton.
Duháhiin somealmmuhemiin ii vuhtto, ahte guovlluin ásset olbmot
Váttisvuođaid dagaha maid dat, jus oidnet guovllu dušše luopmobáikin ja fiinna luondun. Ovdamearkka dihte Norgga bealde leat dáhpáhusat, main turisttat leat fitnan hávdeeatnamis dikšumin hivssetdárbbuideasat. Elina Hutton ássá Romssas ja son lea ieš oaidnán, mo turisttat leat fitnan cissamin su fanasvistti guoras ja govven su šilju.
– Dat muitala das, ahte turisttat eai šat ádde, ahte báikkálaččat ellet dábálaš árgga dain guovlluin.
Hutton dutkkai nákkosgirjjis várás sullii 6 000 Instagramis almmuhuvvon gova, dain 90 proseantta lei birrasis.
Báikkálaččat eai vuhtton jur moge. Sápmelaččat eai lean máinnušuvvon oktiige.
– Ovtta govas lei govvateakstan, ahte ”báikkálaččat leat vuolgán johtui”. Govas ledje bohccot, eai olbmot.