Suoma, Norgga ja Ruoŧa sámedikkiid oktasašbargoorgánas Sámi parlamentáralaš ráđis váilu ain iežas čállingoddi. Dat boahtá leat parlamentarálaš ráđi čuovvovas baji okta deháleamos áššiin maid ovddidit, muitala Norgga sámedikki presideanta Silje Karine Muotka.
– Mis lea dál dat systema, ahte mii lonuhat hálddahuslaš searaid maiddái juohke háve, go mii lonuhat jođihangotti. Muhto dat mielddisbuktá, ahte mis leat iešguđetge vierut ja vuogit mo mii čuovvolat dan barggu. Mun oaivvildan, ahte livčče buorre jus mis livčče bistevaš čállingoddi, dadjá Muotka.
Sámi parlamentáralaš ráđđái leat geahččalan oažžut iežas čállingotti jo guhká. Stuorámus sivvan dasa, ahte ášši ii leat ovdánan, leamaš ruhta, dadjá Suoma sámedikki nubbi várreságadoalli Tuomas Aslak Juuso.
– Miihan leat geahččalan iežaimet stáhtaiguin oažžut stáhtabudjehtalaš ruđa, muhto dat ii leat lihkostuvvan nu bures. Eará ruhtagálduid ohcan lea hástaleaddji. Fásta doaimma ásaheapmi ii leat nu álki prošeaktaruhtademiin, muhto várra mii fertet guorahallat dakkár guhkit áigge prošeaktavejolašvuođaid.
Norgga sámediggi jođihišgoahtá dál SPR
Suoma sámedikki ságadoalliáigodat nogai duorastaga ja ságadoallivuohta sirdásii Norgga Sámediggái.
Juuso muitala, ahte Suoma sámedikki ságadoalliáigodat leamaš máŋggabealát. Bohtosatge ságadoalliáigodagas leat šaddan.
– Ovdamearkka dihte dat, ahte mii leat čielggadan guđe ládje aktasaš čállingotti ásaheapmi vejolaččat sáhtášii ovdánit, muhto dat bargu gáibida vel olu, máinnaša Juuso.
Sámi parlamentáralaš ráđđi lei čoahkkanan Anárii čoahkkimastit duorastaga 16.1. Áššelisttus ledje earret eará doaibmačilgehus vássán bajis ja čuovvovaš baji doaibmaplána.