Ohcejohkalaš Iivari Koutonen lea birgen badjel guhtta jagi biilla haga. Son bártidii iežas biillain farga dan maŋŋá, go lei fárren Ohcejohkii.
Bargo- ja astoáiggemátkkiid son lea juo hárjánan johtit linnjábiillain ja muhtumin lea ožžon biilla luoikkasin ustitlaš oahppásis.
– Lean birgen bures, go muhtumin buorredáhtolaš olbmot váldet mu fárrui. Dat lea eallin, man lean válljen ja lean gal hui duđavaš dasa, muitala Koutonen.
Oktasašgeavahanbiila gildii seastima dihtii
Álo muhtumin leat goit dáhpáhusat go Koutonen váillaha biilla johtimii. Son láve fitnat gieldda skuvllain bargomátkkis. Ohcejoga gielddas ii leat almmolaš johtolat gieldda giliid gaskal.
Ohcejoga gielda válddii jagi álggus atnui oktasašgeavahanbiilla, mainna gieldda bargit sáhttet vuodjit bargomátkkiid.
Gielddahoavda Päivi Kontio jáhkká, ahte biillain sestet ruđa.
– Oktasašgeavahanbiillas leamašan guhká sáhka. Gieldda mátkegolut nappo kilomehterbuhtadusat leat nu stuorrát daningo mis leat guhkes gaskat. Smiehtadeimmet, jos dákkár oktasašgeavahanbiillain sáhttit vuolidit daid mátkegoluid, muitala Kontio.
Erenoamáš dán biillas lea dat, ahte nu báikkálaččat go turisttatge sáhttet láigohit biilla.
– Dáinna biillain sáhttá maid vuodjit Norgii vaikkoba beaivereisui, jus lea dárbu, muitala Kontio.
Ovtta jagi iskkadeapmi
Seammá Omago-nammasaš fitnodaga oktasašgeavahanbiillat gávdnojit miehtá Suoma ja Lappi eanangotti.
Earret eará Nuorta-Lappis Giemajávrris leat leamaš duđavaččat biilla geavaheapmái. Dat movttiidahtii maid Ohcejoga geahččalit mátkkošteami ođđa vuogi.
Roavvenjárggas oktasašgeavahanbiilla soahpámuš nohká, daningo seastimat eai šaddan oanehis mátkkiid dihte.
Ohcejohka iská dan jagi, leago biillas ávki gildii.
– Mis leat stuorra sávaldagat, ahte oaččošeimmet goluid vulos dainna biillain. Dieđusge okta biilla ii leat čoavddus buohkaid dárbbuide, muhto dat lea mainna geahččalit dál, dadjá Kontio.
Girjerádjobargii oktasašgeavahanbiilla geavaheapmi beare álkidahttá árgga.
Son áigu vuos hárjehallat astoáiggevuodjima.
– Áiggon fitnat vuos Njuorggámis gávppis. De bargui Gáregasnjárgga skuvlii muitalit girjjiin. Gal dat atnui boahtá, ferte fal ráfis hárjehallat fas vuodjit, dadjá Koutonen.