Gárasavvonlaš Máret-Elle Valkeapää, 19, searvá The Voice of Finland -gilvui

Máret-Elle Valkeapää lea jo unnivuođa rájes lávlon ja dál son beassá čájehit dáidduidis olles riikii, go lea mielde The Voice of Finland -lávlungilvvus.

Máret-Elle Valkeapää ii leat vel plánen musihkkára ámmáha, muhto musihkka lea leamašan álo sutnje dehálaš astoáiggedoaibma. Govva: Saku Tiainen / Sanoma

Xia Torikka

29.1. 9:44

19-jahkásaš boazodoalli Máret-Elle Valkeapää lea mielde The Voice of Finland -lávlungilvvu ođđa bajis. Gárasavvonlaš Valkeapää lea lávlon ja juoigan jo unnivuođa rájes. Su jiena leat ovdal beassan gullat ovdamearkka dihte Ima Mánážat -skearrus.

Danin Valkeapää oarbmealli hohkkahiige su searvat The Voice of Finland -gilvui.

– Dat lei oalle extempore idea. Mu oambealli dajai, ahte manin it dál oza dohko go leat geargan logahagas. De mun googlajin dan ja oidnen, ahte ohcan nohká moatte beaivvi geažes ja jurddašin, ahte oh my god. De mun áibbas leaikkain govvejin ohcanvideo, sáddejin dan ja de bessen dohko.

Máret-Elle Valkeapää ii geargan oba ballatge go ozai nu fáhkkestaga fárrui gilvui. Video sáddema maŋŋá son oaččui bovdehusa lávluniskosii, main válljejit geat besset tv-sáddagiidda loaiddastit.

– In mun dange stressen ollenge, in lean dan bihtáge jurddašan. Mannen fal dovddu mielde. Lávluniskkosis lávlon Mirella bihtá Timanttei.

Guldal Máret-Elle Valkeapää jearahallama dás.

The Voice of Finland -gilvvus leat máŋga oasi ovdalgo besset njuolggosáddagiidda. Vuosttasin lávlu galgá beassat nu gohčoduvvon Ääni ratkaisee (jietna mearrida) -oasis čađa. Das duopmárat eai vel oainne gii lea lávddi alde, baicca galget mearridit lávlu jiena vuođul, beassago lávlu joatkit gilvvus.

Máret-Elle Valkeapää oassi govvejuvvui čakčat. Lunddolaččat son ii sáhte vuos muitalit, mo sutnje geavai ja beasaigo joatkit gilvvus.

– Dat lei hui earálágan. Dat lei balddihahtti, go ledje nu máŋga kamera ja juohke guovllus ledje olbmot. Dat lei gelddolaš beaivi.

Gilvvu ođđa badji lea jo álgán tv:s. Dat oassi, mas Valkeapää lea mielde, čájehuvvo guovvamánu 9. beaivve Nelonen-kanálas. Valkeapää vuordá iluin, ahte olbmot besset oaidnit dan.

– Mun in iešge leat oaidnán dan, de in in dieđe makkár mun ledjen doppe, iešge lean vehá nie ahte mot dat manaige.

The Voice of Finlandis leat maid ovddit bajiin leamašan sápmelaččat mielde. Jagis 2014 gilvui searvvai ohcejohkalaš Áile-Risten Holmerg ja diibmá avvillaš Anna Lumikivi. Sámegillii gilvvus lávllui jagis 2020 maid helssetlaš Saana Guttorm, guhte lea náitalan sápmelaččain.