Njuike sisdoaluide
Njuike sisdoaluide
Sápmi
Ohcejohka

Ohcejogas ráhkkanit olles fártta heargegilvvuide: gilvovahkkoloahpas lea šaddamin albma sámefeasta

Ohcejogas illudit, go Suoma Boazocup olis besset ordnet fas heargegilvvuid máŋggalogi jagi bottu maŋŋá. Gielda leage bidjan máŋga bargi gilvovahkkoloahpa ordnema váras.

Kunnanjohtaja Päivi Kontio ja vapaa-aikasihteeri Kaisa Tapiola-Länsman puhuu puhelimaan porokisapaikalla Mantojärven jäällä.
Gielddahoavda Päivi Kontio ja gieldda astoáiggečálli Kaisa Tapiola-Länsman Máttajávrri alde. Gilvobáiki gárvvásmuvvá olles fártta, bána ja herggiid sadji lea jo gárvvisin. Govva: Anneli Lappalainen / Yle
  • Xia Torikka
  • Anneli Lappalainen

Njukčamánu vuosttas vahkkoloahpas lea hušša Ohcejoga girkosiiddas, go Suoma Boazocup olis lágidit ovtta oassegilvvu doppe.

Ohcejohkalaččat leat jo guhká sávvan, ahte Boazocup lágidivčče oassegilvvu Ohcejogas, muitala gieldda astoáiggečálli Kaisa Tapiola-Länsman. Dál lea gollan jo badjel 20 jagi, go doppe leat maŋemuš háve ordnen heargegilvvuid.

Gielddahoavdda mielas dát lea erenomáš dilálašvuohta buktit gieldda oidnosii vehá earáláhkai.

– Lean máŋgii maid deattuhan servodatlašvuođa ja ovttas bargama mearkkašumi, de dát buorre vejolašvuohta ollašuhttit dan, dadjá Päivi Kontio.

Gilvobáikin lea Máttajávri. Ráhkkaneapmi dán jagáš gilvvuid váras lea jo álgán. Lágideaddjit leat buncon eanemus praktihkalaš áššiid ordnemis.

– Mii fertet buktit deike infrastruktuvrra, hivssegiid, borramuštealttáid, šleađgga ja visot. Dat lea dakkár ovttalágan hástalus, man ferte smiehttat ovddalgihtii, čilge Tapiola-Länsman.

Poromiehiä seisoo Mantojärven jäällä. Mies taluttaa kilpaporoa. Kuva on otettu vuonna 1999.
Gálddoaivvi bálgosa boazodoalli Vesa Länsman ávvudii jagis 1999, go su heargi Sayonara vuittii ruovttuguovllus ordnejuvvon oassegilvvu. Heargegilvvut lágiduvvojedje Máttajávrri alde Ohcejogas. Govva: Kaija Länsman / Yle

Gilvovahkuloahpas šaddamin albma sámefeasta

Heargegilvvu lassin gielda ordne eahketdoaluid báikkálaš hoteallas. Gilvovahkkoloahpa álggahit ovdafeasttain bearjadaga, guovvamánu 28. beaivve, go lávddi ala goargŋu sápmelaš dj-kollektiiva Article3. Lávvardaga, njukčamánu 1. beaivve, loaiddasta Felgen Orkester. Eahketdoaluide leat jo vuovdigoahtán ovdabileahtaid.

Dakkár stuorra dáhpáhusa ordnema váras gielda lea várren guovtti bargi ja guovtti hárjehalli resurssa.

– Gielda lea bidjan bargofámu dan váras. Mis leat gielddabargit bargamin dainna ja mii bidjat dan láhkai návccaid heargegilvvu ordnemii, muitala gielddahoavda Päivi Kontio.

Utsjoen vapaa-aikasihteeri Kaisa Tapiola-Länsman on tyytyväinen Utsjoen porokisojen järjestelyistä.
Kaisa Tapiola-Länsman bargá gieldda beales buvttadeaddjin heargegilvvuin. Govva: Anneli Lappalainen / Yle

Gieldda bargiid lassin eaktodáhtolaččat leat dehálaš rollas. Kaisa Tapiola-Länsman lohká, ahte eaktodáhtolaččaid leat ožžon bures fárrui Anára ráje. Lunddolaččat maid Ohcejot guovllu bálgosiid badjeolbmot leat movttáskan leat veahkkin gilvvuid ordnemis.

– Muhto jus lea giinu, gii háliida boahtit bullá láibut de ain lea báiki rabas, cavgila Tapiola-Länsman.

Ieš gilvvu ordnemis vástida Ohcejoga gievrrat -searvi. Suoma heargegilvvohallit -searvi eaiggáduššá olles Boazocupa. Boazocupii gullet njeallje oassegilvvu, main eanemus čuoggáid čoaggán hearggit besset finálii, Anára heargegonagasgilvui.

Divvojuvvon 31.1.2025 diibmu 16.50: Gilvvu ordnemis vástida Ohcejoga gievrrat -searvi, ii Suoma heargegilvvohalliid searvi, nu mo vuos lei čállon.