Buoret ovttas go okto aŋkke gielakaféa oassálastiid mielas.
Miia Marjaranta ja Mirja Savolainen gazzaba sámegiela ja kultuvrra oahpuid Sámi oahpahusguovddážis Anáris. Studeantta guoktás leat giellahárjehallanvahkut ja daid gudnin háliideigga dahkat juoidá erenoamáža. Soai jurdileigga lágidit giellakaféa ja bovdiiga gáregasnjárggalaččaid čoahkkanit gilivissui.
– Dáppe ii leat bággu hállat. Buorre go sáhttá guldalit ja áddenge bures, Marjaranta smiehttá.
Marjaranta ja Savolainen láibbuiga sarritgáhku ja vuoššaiga gáfe olbmuid várás. Nu ollejedje nuppiidasaset oahpes olbmot davvisámegillii dáikit.
Sofe Hánsa, Hans Niittyvuopio bođii biergopasteijaiguin ja lákcagáhkuin. Son hálidii ávvudit seammás iežas riegádanbeaivvi.
Niillasaš Ovllá Heaikka Heaika, Heikki Niittyvuopio ollii báikki ala diđolažžan das, ahte giellakaféa lassin giliviesus ávvudedje riegádanbeivviid.
– Dát lea erenomáš dilálašvuohta. Mii leat dange vel ávvudan ja Sofe-Hánsa lea buktán lákcagáhku. Ii dán buorebut vel sáhttán leat, Heikki Niittyvuopio árvalastá.
Hans Niittyvuopio lea maiddái duđavaš. Son giitala Marjaranta ja Savolainen, geat lágideigga giellakaféa Gáregasnjárgii.
– Dat lea hirbmat somá ja buorre dákkárge, ahte hálidit oahppat ja gullat. Dáppe Gáregasnjárggas hállet nu čielga sámegiela. Eai geavat maidege loatnasániid sámegiela sadjái, rábmosta Sofe Hánsa.
Olbmot vásihit, ahte ovttastallan buorida dovdduid. Ovttastaladettiin muitut máhccet millii ja liegga miella. Dáhpáhus lei dehálaš vásihus maiddái Mirja Savolainen mielas.
– Lean duđavaš, ahte mus lea dákkár fiinna vejolašvuohta oassálastit ja sámástit dáppe.
Divvojuvvon 13.2. diibmu 7.37 Mirja Savolainen namma.