Giehtagierraga guovllus lea mohtorjohtolat lassánan nu sakka, ahte Meahciráđđehus lea dál čielggadišgoahtán mohtorjohtolaga dagahan hehttehusaid. Ulbmilin lea gullat iešguđet joavkkuid ja oassebeliid giđa ja boahtte geasi áigge.
Čielggadeamis galget vihkkehallat, ahte leago mohtorjohtolat juo doarvái vai sáhtašiigo dat vejolaččat vel lassánit Giehtagierragis.
– Sáhka lea meahcceguovllus, masa guoská maiddái iežas láhka. Mii leat beroštuvvan diehtit, ahte leago doaibma bistevaš vuođu alde ja ollašuvvetgo meahcceguovlolága ulbmilat, dadjá Elina Odé Meahciráđđehusa luonddubálvalusain.
Mohtorjohtolagain oaivvildit mohtorgielkásafáriid, mohtorgielkáreahkafievrredemiid ja maiddái helikopter- ja girdimášenjohtolaga guovllus.
Geavatlaččat gažaldat lea das, ahte hehttego dálá hámát mohtorjohtolat Giehtagierraga báikkálaš álbmoga, sámekultuvrra, luondduealáhusaid, vánddardeddjiid ja eará fitnodatdoaimmaid ja daid ovddideami.
Lassánan johtolat buktán fuola luonddu ráfehuhttimis
Dálá dilis Giehtagierraga guovllus doibmet 54 mohtorgielkásafárifitnodaga.
Vai mohtorgielkásafárifitnodat sáhttá doaibmat stáhta eatnamiin, dat ferte vuos oažžut Meahciráđđehusas lobi dahje miehtama gielkágeainnuid geavaheapmái. Giehtagierragis dákkár soahpamušat leat dahkkon eanemusat olles Lappis.
Meahciráđđehus leage ožžon olu máhcahaga Giehtagierraga mohtorjohtolaga lassáneamis. Meahciráđđehusa oaidnu lea, ahte fitnodagat leat goit ovdal nagodan heivejit doaimmaideaset oktii boazodoaluin. Go johtolat lea lassánan, de leat maid fuolat čuožžilan ain eanet.
– Olbmot vásihit, ahte luonddu ráfehuhttet. Safárijoavkkut leat duođai stuorrát, doapparfuolaheamis leat hástalusat, dasgo johtolat ii njukča-cuoŋománus oba bisánge ja dat lea nu olu, čilge Elina Odé Meahciráđđehusas.
Maŋemuš jagiid helikopter- ja girdimášenjohtolagas leamašan birrasiid 700 áššehasa jahkásaččat. Lohku lea goit sakka geahppánan. Ovdamearkka dihte jagis 2016 duoddariidda girddihedje geasi ja čavčča áigge 2 900 olbmo.
Meahciráđđehus sáhtášii ráddjet mohtorjohtolaga, muhto ii leat vel háliidan
Meahciráđđehusa mielde maŋemuš viđa jagi áigge Giehtagierragii leat boahtán birrasiid 20 ođđa safárifitnodatdoalli. Eará guovlluin Davvi-Suomas stáhta eatnamiin doibmet Meahciráđđehusa miehtamiin 46 fitnodaga.
Earret eará Gilbbesjávrris guhká doaibman báikkálaš safárifitnodagat leat háliidan bisuhit doaimma dihto rámmaid siste.
– Mii gudnejahttit soahpamušaid. Báikkálaččaid láibi ja dienas boahtá oalát turismmas. Deike lea álki boahtit, muhto min lea váttis sirdit dan eará sadjái, dadjá Jussi Rauhala Kilpissafarit fitnodagas.
Giehtagierraga guovlu leage Suoma bivnnuheamos meahcceguovlu galledeaddjimeriid ektui. Meahciráđđehus sáhttá eananeaiggádin ráddjet mohtorjohtolaga, muhto dan dat ii leat vel háliidan bargat.
Ulbmilin lea gávnnahit, ahte leago mohtorjohtolat olahan dál bajimus dásis Giehtagierragis.
– Ferte čielggadit, ahte jus ii leat šat vejolaš lasihit johtolaga, de mat livčče buorit kriterat juoga nu lágan dihtomearrái. Mo mii dorvvastivččiimet ovttaveardásašvuođa, dadjá Elina Odé.