Oppa bearraša Mumenvággi-animašuvdnaráiddus lea dán giđa ilbman fas ođđa badji, muhto sámegillii dan ii leat vel beassan geahččat. Yle Draama hoavda Jarmo Lampela muitala, ahte áigumuššan lea dubbet ođđasamosge baji nuortalaš-, anáraš- ja davvisámegillii.
– Buvttadanfitnodagas ledje árat iešguđetlágan ruhtadanvuogit dan ollašuhttimii. Dán háve dat eai lihkostuvvan ja dál skábmamánu rájes leat ohcan ođđa ruhtadeami. Njukčamánus čielgá, fidnetgo mii dasa ruhtadeami.
Lampela goittotge nanne, ahte jus ruhtadeapmi ii gávdno olggobealde, dat sáhttá lágiduvvot Yle:s.
– Ulbmilin lea ahte oaččošeimmet dan barggu vuollái vel dán giđa áigge, Lampela lohká.
Ođđasamos badji lea Mumenvákki njealját ja maŋimuš badji. Yle lea diŋgon ráiddu Gutsy Animations buvttadanfitnodagas.
Davviriikalaš ovttasbargguin boađi boađi lasi prográmmat sámegillii
Yle Draama lea bargan ovttasbarggu maiddái NRK:in dan ovdii, ahte buvttaduvvošedje sámegielat tv-prográmmat. Dan boađusin ovdamearkka dihte NRK davvisámegielat Heajastallan-ráidu boahtá oidnosii maiddái Yle Areenai boahtte jagi.
Yle Draama lea muđuige huksegoahtán oktavuođaid Sápmái.
– Yle Draama bargá ovttasbarggu earret eará Sámi oahpahusguovddážiin ja Internašunála Sámi Filbmainstituhtain, Jarmo Lampela muitala.
Son jáhkká, ahte geahččit besset oaidnit sámegielat prográmmaid maiddái boahttevuođas.
– Mii váldit vuostá maiddái ideaid ja sáhttit rávvet, mo ovddidit prográmmaid ja filmmaid sámegillii.