Sámedikki ságadoalli Pirita Näkkäläjärvi vánhenvuođaluomu áigásaš sadjásašvuođa ordnestallamat ságastahtte Sámedikki dievasčoahkkimis vuossárgga. Ságadoallijoavku soabai mannan jagi bealde juovlamánus, ahte Näkkäläjärvi vánhenvuođaluomu áigge sadjásažžan doaibmá nubbi várreságadoalli Tuomas Aslak Juuso.
Seammás sii sohpe, maid áššiid dikšu vuosttas várreságadoalli Leo Aikio ja maid Tuomas Aslak Juuso.
Sámedikkeáirras Anu Avaskari ii leat duđavaš dasa, mo áššiin leat meannudan. Avaskari mielas dievasčoahkkin lei galgat beassat mearridit dán áššis.
– Mu mielas ášši livčče galgan buktit ollesčoahkkimii mearridanláhkái. Ollesčoahkkin vállje fásta ságadoalli, de maid sadjásašvuohtaordnemat gulašedje ollesčoahkkimii, oaivvilda Avaskari.
Tuomas Aslak Juuso dadjá sin čuvvon Sámedikki bargoortnega. Su mielas lea goit buorre, ahte áššis ságastallo.
– Dathan lea álot buorre, ahte áirasat besset jearrat daid áššiid ja loktet daid ságastallamii.
Ášši eai gieđahallan dievasčoahkkimis dađi eanet, dannego bargoortnega mielde ollesčoahkkin ii váldde badjelmearálaš áššiid gieđahallamii, jus dat ii leat ovttamielalaš.