Maŋemuš beivviid áigge lea davimus Sámis leamašan njáhcosiivvut ja bivvalat. Ii ihkkuge leat finadan buollaša bealde ja geainnut leamašan čáhcin ja soavlin.
Njáhcosiivvut leatge dagahan oaivebákčasa maid fitnodatdolliide Anáris. Mohtorgielkásafáriid leat gártan sirdit eret Anárjávrri jieŋa alde, go muohta lea measta oalát suddan ja jieŋa alde lea váttis vuodjit gielkkáin dorvvolaččat.
Wilderness Hotel Inari hoavda Essi Lappalainen muitala, ahte dákkár dilli ii leat goassege leamašan guovvamánus sin moaddelot jagi bistán fitnodatdoaimma áigge. Dál buot mohtorgielkásafárit vuddjojuvvojit meahcis.
– Jávrre alde lea nu molsašuddi siivu. Muhtin saje lea ain aivve buorre vuodjit, muhto báikkuid lea fas aivve gálja. Dát lea beare hástaleaddji min áššehasaide, de danin mearrideimmet sirdit mohtorgielkkáid eret doppe, čilge Lappalainen.
Muohtavátni váikkuha maiddái báikegotti čuoigiide. Máŋga almmolaš čuoiganláhtu johtet jávrri alde eaige dat leat dál čuoiggahahtti ortnegis.
Muohtahis siivvut gullet riddoguovlluide, oaivvilda meteorologa
Bivvalat leat nagodan suddadit muohttaga davimus Sámis ja muohta lea maid mannan čoahkkái. Dálkedutkanlágádusa meteorologa Tuomo Bergman dadjá, ahte dákkár muohtahis siivvut gullet Suoma dálkkádagas riddoguovlluide.
– Iihan dat leat dábálaš, ahte muohta suddá jieŋa alde eret. Dábálaččat muohta láve leat davvin jieŋa alde ja oluge, dadjá Bergman.
Davimus Sámis muohta mearit rievddadit guovlluid mielde. Oarjin Gilbbesjávrris lea dálá dilis juo badjel mehter muohta. Anára guovllus fas lea birrasiid 50 sentte. Uhcimusat muohta lea Eanodaga máttaoasis ja Ohcejogas.
Dán dálvve liekkasvuođat leat mannan vulos ja bajás nu dávjá, ahte illá meteorologage lea bisson fárttas mielde.
– Davvin leamašan ruosti buollašat ja de fas hui bivvalat ja njáhcosiivvut máŋgii. Davimus Sámis leat gosii mihtiduvvon ođđa liekkasolahusatge dán dálvve ja dat gal ii gula normála dálvedálkái, čilge Bergman.
Dálkeeinnostusaid mielde dás duohko gal siivvut jorggihit buollaša beallái, muhto muđuid gal lea ain oalle bivval. Eambo muohta ii leat dál vuos lohpiduvvon.
Biikabealta buorida dorvvolašvuođa
Fitnodat lea ožžon Anára gielddas gaskaboddosaš lobi sirdit mohtorgielkkáid gili oarjegeahčái.
– Mii leat dás eanemustá vahku ja geahččat, ahte beassatgo fas ruovttoluotta jávrri ala. Mis lea gal nubbige báiki gili olggo bealde, gosa lea vejolaš sirdit, muitala Lappalainen.
Wilderness hotealla lea gal juoga nu láhkai ráhkkanan hástaleaddji siivvuide, go sis gal gávdnojit maid mohtorgielkkát, main lea biikabealta. Dat buorida dorvvolašvuođa ja addá buoret coavcci jieŋa alde.
– Mis gal lea plánain boahtteáiggis oastit ain eanet mohtorgielkkáid main lea biikabealta, muitala Lappalainen.
Rievddadeaddji dálkkiid ja siivvuid geažil fitnodat šaddá smiehttat doaimmaidis ain beaivvi hávil.
– Lihkus min guossit leat dáppe dábálaččat vahku, de gal sáhttá veháš spiehkastitge prográmmas, dadjá Essi Lappalainen.