Sámedikki kulturlávdegoddi lea almmustahttán kulturdoarjagiid oažžuid jahkái 2025. Doarjagiid mákset oahpahus- ja kulturministeriija mieđihan stáhtadoarjagiin.
Kulturlávdegoddi jugii veahkkeruđaid oktiibuot 220 000 euro ovddas.
Sámedikki doaimmahahkii bohte oktiibuot 80 ohcamuša, main doarjagat ohccojuvvojedje oktiibuot 482 578 euro ovddas.
Mieđihuvvon doarjagat leat oaivvilduvvon sámegielat kultuvrra ovddideapmái, davviriikkalaš sámeservviid doarjumii ja sámekirkostobuin fuolaheapmái.
Sámi Duodjái stuorámus doaibmadoarjja
Davviriikkaid oktasaš sámedáiddaservviide sámedikki kulturlávdegoddi juolludii oktiibuot 18 000 euro. Eanemus veahkkeruđa fitnii Sámiráđi Suoma juogus, 3 400 euro.
Doaibmadoarjagiid ožžo 23 searvvi. Dain stuorámus ovttaskas doaibmadoarjagat mieđihuvvojedje Sámi Duodji -searvái ja Ohcejoga girkostohposearvái. Sámi Duodji oažžu dán jagi 23 000 euro doaibmadoarjaga ja girkostobut fas 14 000 euro.
Anarâškielâ servi oažžu oktiibuot 15 000 euro Anarâš-bláđi Loostâš -digibláđi ja anárašgielat mánáidgirjji almmustahttimii.
Doaibmadoarjagiid lassin kulturlávdegoddi juolludii servviide badjel 60 000 euro iešguđetlágan dáhpáhusaid ordnemii ja prošeavttaide.
Sámedikki kulturlávdegoddi juolludii maiddái doarjagiid ovttaskas olbmuide iešguđetlágan dáiddalaš ja kultuvrralaš bargguide.
Stuorámus veahkkeruđa fitnii Minna Lehtola. Son oažžu 4 000 euro prošeaktadoarjaga anáraš- ja nuortalašgielat smávva mánáid govvagirjji ráhkadeapmái.
Girječálli Inger Mari Aikio fas oaččui 3 000 euro bargostipeandda oanehis lyrihkaromána čállimii.
Geahča buot kulturdoarjagiid oažžuid namaid ja ruhtasupmiid Sámedikki neahttasiiddus.