Riikkabeivviid ruhtaváljagoddi lea otne almmuhan cealkámuša sámediggeláhkaevttohusas. Vuođđoláhkaváljagoddái dahkkon cealkámušas sámediggeláhkaevttohusa guorahallet erenomážit ealáhusaid ja ealáhushárjeheaddjiid ovttaveardásašvuođa geahččanguovllus.
Ruhtaváljagoddi gidde fuomášumi erenomážit sámediggelága ovttasdoaibman- ja ráđđádallangeatnegasvuhtii. Láhkaevttohussii lea dárkilabbot čállojuvvon njuolggadusain, mo meannudit ráđđádallangeatnagasvuođain ja makkár áigetávvaliin ráđđádallamat gevvojuvvojit.
Sámediggeláhkaevttohusa mielde eiseválddit fertejit ráđđádallat Sámedikkiin dalle, go sii válmmaštallet láhkaásahusaid, hálddahuslaš mearrádusaid ja eará doaibmabijuid, mat váikkuhit erenomážit sápmelaččaide.
Ođđa láhkaevttohusas geatnegasvuohta viiddiduvvošii guoskat viidábut iešguđet doaimmaid. Láhkaevttohusa mielde sámiid ruovttuguovllu guoskevaš fidnuid lassin eiseválddit galget ráđđádallat Sámedikkiin maiddái dakkár fidnuin, mat leat ruovttuguovllu olggobealde, muhto maid váikkuhusat dovdojit maiddái sámeguovllus.
Ruhtaváljagoddi cealká, ahte Sámedikkis ii livčče riekti caggat mearrádusaid
Ruhtaváljagoddi atná dehálažžan ulbmila das, ahte ovttasdoaibman- ja ráđđádallangeatnegasvuođain olahuvvo ovttaoaivilvuohta Sámedikkiin sápmelaččaide mearkkašahtti áššiin.
Nuppe dáfus ruhtaváljagoddi oaivvilda, ahte dihto njuolggadusaiguin basttášedje dorvvastit ráđđádallamiid njuovžilvuođa. Dáinna sii dárkkuhit, ahte fáhkkes ja hohpolaš áššiiguin ráđđádallanáigi sáhtášii leat oanehut go dábálaččat.
Dasa lassin ruhtaváljagotti cealkámušas evttohuvvo, ahte Sámedikki passiivvalašvuohta ráđđádallamiin ii easttašii mearrádusdahkama, iige Sámedikkis livčče riekti caggat mearrádusdahkama.
Ruhtaváljagoddi deattuha, ahte evttohus ii oaččo menddo ollu eastit, váttásmahttit dahje njoahcudit investerenfitnuid plánema ja ollašuhttima. Dat lea váljagotti mielas dehálaš namalassii dalle go geahččalit sirdásit buhtes energiijabuvttadeapmái ja giktalit investerema guvlui.
Dat lea goalmmát váljagoddecealkámuš sámediggelágas. Eana- ja meahccedoallováljagoddi sihke Bargoeallin- ja dásseárvováljagoddi gárvejedje cealkámušaid mannan vahkus. Vuođđoláhkaváljagoddi lea ain čađaheamen gullamiid.