Njávdáma gili dálkekameras lávejit dárkkistit siivvu ja geainnu ortnega lassin olu earáge. Dálkekameras oidnojit maid bensenbumppat, gávpi ja pubba.
– Geahčan masá beaivválaččat kamera gova. Muhtumin máŋgii beaivvis. Álo dat beaivváš báitá ja lea buorre siivu, bohkosa njávdánlaš dáksevuoddji Kauko Ljetoff.
Njávdáma pubba eaiggát Lasse Kekäle muitala, ahte dálkekamera bokte lávejit geahččat, ahte leago pubbas olbmot. Dálkekamera informašuvdna ii álo goittotge muital duohtavuođa.
– Olbmothan eai vuoje biillain, go bohtet vuollaga juhkat, muittuha Kekäle.
Suoma johtolagastivrenlágádus FinTraffic lea gávnnahan, ahte Njávdáma dálkekamera čuvvot buot eanemus čalbmepárat olles Suomas.
Lasse Kekäle lohká iežas áddet, manin Njávdán geasuha nu máŋgasiid. Son iešge čuovvu kamera dalle go ii leat ruovttus.
– Lea somá čuovvut leago gilis hušša. Njávdánhan lea kultuvrra váibmu. Buohkat háliidit deike unnimustá kamera bokte, árvala Kekäle.
Njávdánlaš Jouni Männistö diehtá, ahte eandaliige Norgga bealde čuvvot dárkilit boaldámušhattiid.
– Máŋgasat gehččet kameras, ahte vuolggángo dál táŋket vai vuorddángo, jus ihttin livččii vel hálbbit.
Njávdánlaččaid mielde dálkekameras oažžu iešguđetlágan informašuvnna gilis.
Njávdáma dálkekamera gehččet olgoriikkainge
Gávpejas Juha Kekäle ii lean gal oba jurddašit, ahte Suoma bivnnuhamos dálkekamera livččii aiddo Njávdámis.
Son jáhkká, ahte sivvan dasa lea, go turisttat návddašit Njávdáma birrasis kamera bokte.
– Njávdán lea eksohtalaš báiki, mii boktá beroštumi. Mis leat moanat kundarat Mátta-Suomas, geat fitnet dáppe geassit. Sii čuvvot kameras, mii dáppe dáhpáhuvvá. Sii riŋgedalletge muhtumin ja muitalit, mo sis manná. Lohket iežaset oaidnán kameras, ahte dáppe leat olbmot.
Juha Kekäle gávnnai vieljainis olgoriikalaš neahttasiiddu, mas čájehedje Njávdáma dálkekamera. Kommeanttat ledje valljis ja olbmot orru liikomin gili eallimii.
Okta neahttakommeanta bázii goittot Kekäle millii.
– Doppe lea fas soames báikkálaš mannamin viežžat vuollaga, go ihkku giinu váccii gávppi šilljui, čaibmá Kekäle.
Njávdámis leat dálge turisttat. Duiskalaš Kerstin Ring ja Manfred Weiss leaba boahtán Njávdámii danin, go leigga oaidnán báikki dálkekameras. Soai láveba muđuige luomostállat dávjá Suomas. Ruovttus Duiskkas Weiss geahčada ovtto dálkekamerain, makkár siivu Suomas lea.
Dán vuoro soai leaba čuoiggadan Suoločielggis muhto mearrideigga vuolgit geahččat dálkekameras oahpes gili.
– Dajaime iežame niidii, ahte geahččá dálkekamera liŋkka vai oaidná munno dáppe, muitala Kerstin Ring ja čájeha dálkekamera gova, mas son guimmiinis čearsá.