Dán giđa studeantaiskosat nappo čállimat álget leat loahpa bealde. Maŋimužžan čállet bearjadaga sámegiela eatnigiellan ja girjjálašvuođa.
Anárlaš abiturienta Sáranne Näkkäläjärvi čállá oktiibuot guhtta ávdnasa, main eanemus lea lohkan ja hárjehallan sámegiela iskosii. Sámegiela lassin son čálii matematihka, kemiija, ruoŧagiela, suomagiela, ja eaŋgalasgiela.
– Dat lea vehá váttis go ii dieđe mas ferte čállit, de ferte fal giellaoahpa geahččat čađa ja geahččat boares čállosiid, ahte makkár dássi lea leamašan ovdal ja sáhtálii boahtit dán jagi. Várra lean eanemus lohkan dán iskosii go maid ovttage eará iskosii, muitala Näkkäläjärvi.
Davvisámegiela čállet eatnigiellan dán jagi guđas. Maiddái vierisgiellan davvisámegiela čálle guđas ja okta čálii anárašgiela. Anárašgiela eatnigiellan ii lean oktage čálli. Nuortalašgillii eai lean čállit obanassiige.
Avvila logahaga davvisámegiela oahpaheaddji Marjaana Aikios leat golbma oahppi, geat čállet sámegiela dán giđa: guokte Avvila logahagas ja okta gáiddusoahppi.
– Juohke jagi lea vehá earálágan dilli. Dál ovdamearkka dihte nuppi luohkás mus leat vihtta oahppi.
Sámegiela eatnigiellan čállin lea Sáranne Näkkäläjärvii dehálaš.
– Go goittotge lean jo ovdal logahaga oba vuođđoskuvlla vázzán sámegillii, de dat lea hui dehálaš. Munnje lea álkit čállit sámegillii ja bargat sámegillii, nu mu mielas dat lea álkit čállit sámegiela go suomagiela.