Taar Sääʹmteʹǧǧ miõđi 300 000 kruun tuärjjõõzz New Amigos -speâll nuõrttsääʹmǩiõllsaž versiooʹje. New Amigos lij raajjâm ǩiõllmättõõllâmspeâllaid juʹn eeʹjj 2007 rääʹjest. Määusteʹmes applikaatioin vuäitt mättõõllâd juʹn nellj jeeʹres sääʹmǩiõl taarǩiõlin.
Sääʹmteeʹǧǧest lij muđoi-i täävtõssân jeällteškueʹtted jeänad da jeänab nuõrttsääʹmǩiõl Taarâst puõʹtti iiʹjji ääiʹj.
– Tät lij leämmaž tuõđi äukkai speâll, koin viiǥǥât ooudâs sääʹmǩiõli mättʼtõõzz. Vuäinam kâʹl, što ääiǥam jiõčč tobdstõõttâd nuõrttsääʹmǩiõʹlle tâʹlles, ko tät pâi valmštââvv, mušttal Sääʹmteeʹǧǧ vuäzzlaž Mikkel Eskil Mikkelsen.
Taar beäʹlnn lie tuʹtǩǩääm nuõrttsääʹmǩiõllsai da ǩiõl jeälltummuž sââʹj taʹnni. Raportt nuõrttsääʹmǩiõl jeälltummšest da ǩiõl sââʹj pirr valmštõõvi alggeeʹjj.
– Rapoortâst puõʹđi samai čiõlggsânji ouʹdde, što nuõrttsääʹmǩiõl ouʹdde taarbaš riikkraaji rââst tuejjeed jeälltemtååimaid. Meeʹst lij jõnn haall viikkâd ooudâs projeeʹktid, koivuiʹm ǩiõl jeälltummuš mâânn õõudårra, mušttal Mikkelsen.
Taar Sääʹmteʹǧǧ lij siõmmnai siõmmnai välddam laauʹǩid nââneed nuõrttsääʹmǩiõl jeälltummuž ouddmiârkkân mainsteeʹl jiõčč sääʹmõutstõõzzin.
– Tieʹttep puk mõõn vaiggâd lij jeällted ǩiõl, leâša kuuitâǥ leäʹp valmmâž ââʹn tuärjjeed tõn. Âlgg leeʹd šiõǥǥ proseʹss, jie-ǥa pâi projeeʹkt projeeʹkti mâŋŋa, leâša jeänab kuʹǩesäiggsaž tuâj da tååim, särnn Mikkelsen.
Nuõrttsääʹmǩiõllsaž versio New Amigos -speâll raajjmõʹšše miõʹtteš 300 000 kruun da tõt õõlǥči valmštõõvvâd puõʹtti eeʹjj ääiʹj.
Lââʹzz sääʹmǩiõllsaž ođđsid vuäitak ǩiõččâd Yle Ođđâz da kuvddled Nuõrttsäämas-seeidast Yle Areenast.