Sámedikki oainnu mielde Lappi guovlostivrra sámegiela lávdegottis ii šaddan dakkár, man birra Sámediggi ráđđádalai buresveadjinguovlluid gaskaboddosaš válmmaštallanorgánain.
Ráđđádallamiin lei sohppojuvvon, ahte sámegiela lávdegottis leat guhtta buresveadjinguovllu nammadan lahtu, vihtta Sámedikki nammadan lahtu ja okta Nuortalaččaid siidačoahkkima nammadan lahttu. Dasa lassin ráđđádallamiin sohpe, ahte lávdegoddi beassá ieš váikkuhit ságadoalli válljemii.
Guovddášbellodat almmuhii vuossárgga, ahte Sámediggi nammada oktiibuot guhtta lahtu ja buresveaddjinguovlu fas čieža. Sámedikki nammadan lahtuin okta lea Nuortalaččaid siidačoahkkima lahttu. Guovddášbellodat oažžu lávdegotti ságadoallivuođa.
Sámegiela lávdegotti bargun lea fuolahit sámegielat sosiála- ja dearvvašvuođasuorggi bálvalusain sámeguovllus.
Sámedikki mielas buresveadjinguovllu bellodagat leat ovttabealagit mearridan sámegiela lávdegotti báikejuogus, eaige leat váldán vuhtii Sámedikki oainnu nu mo láhka geatnegahttá.
– Lea problemáhtalaš, go ráđđádallangeatnegasvuođa ja ráđđádallamiid bohtosiid eai dáhto gudnejahttit, dadjá ságajođiheaddji Tuomas Aslak Juuso Sámedikki dieđáhusas.
Válmmaštallanorgána ii sáhte čatnasit makkárge soahpamušaide
Buresveadjinguovllu gaskaboddosaš válmmaštallanorgána lei ovttaoaivilis Sámedikki evttohusas sámegiela lávdegotti ektui, muitala válmmaštallanorgána ságadoalli Jari Jokela. Son muitala, ahte válmmaštallanorgánas ii leat goittotge riekti čatnasit guovlostivrra beales makkárge soahpamuššii, dasgo das váilu politihkalaš stivren.
– Guovlostivra ii leat dán iige earáge áššiin čatnasan válmmaštallanorgána evttohussii. Stivrras lea riekti mearridit ieš áššiin, maiddái dalle juos dat spiehkasta válmmaštallanorgána mearrádusas, čilge Jokela.
Stuorimus guovlostivrajoavkku, guovddášbellodaga ságadoalli Markus Lohi mielde stivrajoavkkut leat ovttamielalaččat soahpan, ahte sámegiela lávdegottis leat 13 lahtu. Stivrajoavkkut háliidit dainna gudnejahttit Sámedikki sávaldaga nammadit guhtta lahtu gielddaid ja gielaid vuođul, muhto seammás čuovvut prinsihpa das, ahte doaibmaorgánas lea párahis mearri lahtut.
Lohi deattuha, ahte stivrajoavkkut háliidit gudnejahttit gielalaš vuoigatvuođaid ja buoridit sámegielat bálvalusaid sode-suorggis. Son muittuha, ahte buresveadjinguovlluid guoski láhkii merkejuvvon gáibádus sápmelaš ovddasteamis ollašuvvá stivrajoavkkuid plánas. Lága mielde Sámediggi galgá nammadit unnimustá 40 proseantta lávdegotti lahtuin.
– Stivrajoavkkuid linnjemat čuvvot lága. Sámedikki nammadan lahtuid mearri boahtá leat sullii 46 proseantta doaibmaorgánas, dadjá Lohi.
Loahpalaš mearrádus sámegiela lávdegottis dahkko buresveadjinguovllu stivrras.
Beaivvi ságaid ja Yle Ođđasiid Sámis sáhtát maid guldalit Yle Areenas.