Evvan nõmmpeeiʹv -bäʹndd šõõddi Iinteʹmes inn -festivaal puuʹtʼteei Oula Guttoorm aalǥtõõzzâst.
– Oula soiʹttji muʹnne da kõõjji, što lij-a meeʹst bäʹndd. Mon sarnnum suʹnne, što vueʹrd siõmmna, soiʹttjam jeeʹres oummuid. Tõn mâŋŋa mon sarnnum Oulaaʹje, što kâʹl meeʹst lij bäʹndd, kâʹl mij pueʹttep soiʹttjed, mušttal bääʹnd basistt Erkki Feodoroff.
Evvan nõmmpeeiʹvi jeeʹres musikkneeʹǩǩ lie Aimo Aikio (laaul, kitara, mandoliin da kuõsktemsååitanj), Jonne Fofonoff (kitara), Henry Haataja (ruumb), Tero Harju (laaul), Anna Lumikivi (laaul) da Sari Saxholm (garmaan da kuõsktemsååitanj).
Musikk lij luândlaž vueʹǩǩ puʹhtted sääʹmkulttuur ouʹdde
Evvan nõmmpeeiʹv -nõõm maainâs lij hääʹsǩ. Bääʹnd musikkšlaaji mieʹrr lij miâlggâd nuʹt jõnn ku Evvan nõmmpeeiʹvi mieʹrr kaʹlndaarâst.
– Jõs leäk ǩiõččâm ortodookslaž kaʹlndaar, koʹst lie sääʹm nõmmpeeiʹv, de tõʹst lie jiânnai Evvan nõmmpeeiʹv. Miâlggâd juõʹǩǩ neäʹttel lij Evvan nõmmpeiʹvv. Kâʹl tõt lij siõmmna še šutkk Pertti Kurikan nimipäivät -bääʹndest, pååǥǥast Erkki Feodoroff.
Aimo Aikio soiʹttai Evvan nõmmpeeiʹv -bääʹndest kitara, mandoliin da kuõsktemsååitanj. Tõn lââʹssen son läull da lij bääʹnd čeäppõõzzlaž jååʹđteei.
– Čeäppõõzzlaž jååʹđteei lij fiin tittel, koin Feodoroff vuäǯǯai muu mieʹldd. Tõt miârkkšââvv tõn, što mon ouddmiârkkân vaʹsttääm musiikklaž liinjâst da smiõttam, mõõn jeärǥast mij läullap laullʼjid, čiõlggad Aikio.
Jonne Fofonoff lij serddam Kempeleest mååust Âʹvvla ǩeâđđa. Son ij leäkku soiʹttjam ääiʹjben sääʹmǩiõllsaž musiikk.
– Lij tuõđi fiinâs piâssâd bääʹnd mieʹldd. Muu miõlâst musikk lij šiõǥǥ vueʹǩǩ jeällted da puʹhtted jiijjâs kulttuur ouʹdde, da muʹnne tõt lij pukin luândlumus vueʹǩǩ, ceälkk Fofonoff.
Bääʹnd puõʹttiäiʹǧǧ ij leäkku võl snäätnai
Evvan nõmmpeeiʹv soiʹttai jäänmõsân bääʹnd musikkniiʹǩǩi jiiʹjjez musiikk.
– Meeʹst lij juõʹǩǩnallšem musikk. Lie siõmmna kõrrsab musikk da siõmmna temmsab musikk še, ku meeʹst lie nellj oummu, kook läulla da lie raajjâm musiikk, maainast Erkki Feodoroff.
Evvan nõmmpeeiʹvi musikkneeʹǩǩ jälste pirr Lääʹddjânnam da jie leäkku võl piâssâm haʹrjjtõõllâd õõutâst. Bääʹnd puõʹttiäiʹǧǧ lij tän poodd snäätntem.
– Ååskam, što ij ni ǩii võl tieʹđ, mii täʹst šâdd. Vuäitt leeʹd, što mij juäʹtǩǩep soiʹttjed tän mâŋŋa, leâša jiõm tieʹđ võl, särnn Feodoroff.
Evvan nõmmpeeiʹv čuäjtââtt Iinteʹmes inn -festivaalâst sueʹvet 20.8.2022 čiâss 17 Sajoozzâst.
Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.