Boahtte lávvardaga 14.8. lágiduvvo fas Ijahis idja -festivála dábálaš álbmotdáhpáhussan. Diibmá festivála dušše streamejuvvui neahtas koronaepidemiija dihte.
Festiválabuvttadeaddji Oula Guttorm hálida muittuhit olbmuid, geat leat boahtimin Anárii festiválii koronaáiggis, mii joatkašuvvá ain. Festivála lihkostuvvan gáibida doaimmaid buot oassebeliin.
– Mii dieđusge festivála bealis leat ráhkkanan dasa, ahte mii bastit dorvvolaččat festivála čađahit, muhto dat gáibida maiddái festiválagussiin dieđusge oassálastima, dadjá Guttorm.
Guttorm ávžžuha olbmuid boahtit festiválabáikái dušše dearvvasin, bassat ja desinfieret gieđaid báikki alde, geavahit báŋkokoartta máksimis ja vel fuolahit dorvogaskkain. Máskka ii goit leat bággu geavahit festiválas.
– Jus leat makkárge dávdamearkkat, de dallehan mis lea dat livestream, man sáhttá báhcit ruoktot dasto geahččat, rávvesta Guttorm.
Son ávžžuha maid olbmuid boahtit áiggil festiválabáikái, amas šaddat guhkes ráiddut bileahttavuovdimii, dalle dorvogaskkaid doallan sáhttá šaddat váttisin.
Ijahis idja -festivála lágiduvvo lávvardaga 14.8. Anáris Sámekulturguovddáš Sajosa šiljus.
Yle Ođđasiid Sámis ja Beaivvi ságaid sáhtát maid guldalit Yle Areenas.