Dán háve Ijahis idja -festiválas leat ođđa áššin nu gohčoduvvon pop up -bargobájit, muitala festivála veahkkebuvttadeaddji Aleksi Ahlakorpi. Bargobájiin sáhttá earet eará málet graffiti, guldalit boares skearruid ja njoarostit. Mánáide maid lea iežas bargobádji, man lágida Sámi mánáidkulturguovddáš Mánnu.
– Dat gávdnojit birra festiválaguovllu. Lea doarvái sadji buohkaide ja beassá geahččat juohke hommá, ahte mii doppe gávdno, joatká Ahlakorpi.
Dábálaččat festiválas leamaš iežas beaivi mánáide ja nuoraide. Dán háve bargobájiin leat doaimmat sidjiide, muhto maid ovddeš nuoraide.
– Bargobájiide sáhttet oassálastit maiddái mánnávuođa veteránat, ahte buohkat leat buresboahtán daidda. Jus ii šat dovdda iežas mánnán, muhto hálida graffiti málet, de ii eará fal dohko bargobádjái de gal das oahppá dasto málet, ávžžuha Ahlakorpi.
Bargobájiid lassin festiválabáikkis lágidit njoarostangilvvu ja maiddái duojárat bohtet vuovdit dujiideaset, muittuhastá vel Ahlakorpi.
Ijahis idja -festivála lágiduvvo lávvardaga 14.8. Anáris Sámekulturguovddáš Sajosa šiljus.
Yle Ođđasiid Sámis ja Beaivvi ságaid sáhtát maid guldalit Yle Areenas.