Nuoraidkonsearta lea dat, man Ijahis idja -festivála dáiddalaš jođiheaddji Anna Näkkäläjärvi-Länsman iluin lea čuvvon juohke jagi. Doppe bohtet oidnosii boahttevaš artisttat.
– Doppe leatge dán jagi ollu joavkkut, ahte gánniha boahtit dohko geahččat, ja máŋggabealat prográmma. Okta artista ii biso lávddi alde nu guhká, ahte dat váldá moadde bihtá ja de fas lávke lávdái ođđa, ahte dan lea sihkkarit hui somá čuovvut.
Dán jagáš nuoraidkonsearttas čuojahit Erke Eriksen, Iŋgá, Kootkmiõhtt, Láhppon ja Yungmiqu. Näkkäläjärvi-Länsman jáhkká, ahte nuoraide lea dehálaš beassat čuojahit festiválii stuorra lávddi ala.
– Suoma bealde mis lea dieđusge dat Sámenuoraid dáiddadáhpáhus, ahte doppehan lea dieđusge maiddái vehá seammalágan dilli. Muhto mun jáhkán, ahte dat Ijahis ija nuoraidkonsearta lea daidda sámenuoraide, geat leat beroštuvvan musihkas, dehálaš lávdi.
Oktan váldonástin lea Jon Henrik Fjällgren
Dán jagáš festiválas okta váldonásttiin lea Ruoŧa beale sápmelašartista Jon Henrik Fjällgren. Ovddit háve son lei Ijahis ijas loaiddasteamen jagis 2015.
– Dat lei dalle siste dat konsearta. Dán jagi dat lea vehá earálágan vásáhus, danin go konsearta lea olgun ja maŋŋeleappos eahkedis. Su musihkka lea dakkár, mii sihkkarit geasuha ollugiid, árvala Näkkäläjärvi-Länsman.
Muhto mii dáhpáhuvvá ovdal konseartta? Artisttat besset nu gohčoduvvon lieggalanjas (su. lämpiö) ráhkkanit iežaset loaiddastanvurrui.
– Juohke artista lea earálágan, muhto máŋgii artista hálida konsentreret ovdal konseartta. Dat lieggalatnja lea doppe danin, ahte artista beassá leat ráfis ovdalgo lávke lávdái. Dat dieđusge gáibida hui ollu leat lávddi alde ja máhttit muitit buot maid lea áigumin ovdanbuktit, muitala Näkkäläjärvi-Länsman.
Ijahis idja -festivála lágiduvvo lávvardaga 14.8. Anáris Sámekulturguovddáš Sajosa šiljus.
Loga maid:
- Ijahis idja 2021: Festiválabuvttadeaddji Oula Guttorm muittuha festiválagussiid koronarávvagiid čuovvumis
- Ijahis idja 2021: Dán jagáš festiválas ođđa áššin leat pop up -bargobájit – Veahkkebuvttadeaddji Aleksi Ahlakorpi ávžžuha maid “ovddeš nuoraid” oassálastit
Yle Sápmi sádde streamsáddaga Yle Areenas ovdadovdduin ja festiválii ráhkkaneamis bearjadaga. Diibmobeale guhkkosaš sátta álgá diibmu 15.00 ja dan sáhttá guldalit maiddái Yle Sámi rádiokanála bokte.
Yle Ođđasiid Sámis ja Beaivvi ságaid sáhtát maid guldalit Yle Areenas.