Jagi álggus lea Helssega dáiddauniversitehtas álgán prošeakta, man ulbmilin lea máhcahit museain leahkki árbedieđu ruovttoluotta eamiálbmotservodagaide. Prošeakta lea diibmá ožžon 359 000 euro ruhtadeami Koneen Säätiös.
Okta prošeavtta ovttasbargoguimmiin lea Sámiid Vuorká-dávvirat -musea Kárášjogas. Museajođiheaddji Jelena Porsanger muitala, ahte sidjiide lea dehálaš leat mielde prošeavttas.
– Jurddašin ahte midjiide lea hui mávssolaš man láhkai min musea nugo eará álgoálbmot museat leat čadnon servodahkii, manlágan oktavuohta lea servodaga ja musea gaskkas.
Porsanger mielde orru koronaáigi erenomážit dál sirren musea eará servodagas. Son sávvá sin musea oažžut buriid nisttiid iežaset bargui prošeavttas.
– Sávan ahte dán prošeavttas mii oažžut eambo interaktiiva gulahallama servodagain dás Kárášjogas ja lagaš guovllus nugo Gáregasnjárggas. Dás mii oažžut perspektiivva dan bargui man mii bargat, mo mii doaibmat, erenomážit go mii veardidit dan dillái mo eará álgoálbmogat máilmmis leat, dadjá Porsanger.
Prošeavtta dutkit ledje vuossárgga 30.8. oahpásmuvvamin Sámiid Vuorká-Dávvirat -museai. Okta prošeavtta dutkiin Hanna Guttorm muitala, ahte dál leat čielggadeamen prošeavttain mo oažžut eamiálbmogiid árbevirolaš dieđu ruovttoluotta maiddái dološ dávviriid ja dujiid bokte.
– Mii leat gullan, ahte Oslo museas leat sullii 178 boares sámi dávvira ja daid hálidivčče buktit ruovttoluotta, muitala Guttorm siva dasa, manin dutkit leat fitnamin Kárášjogas.
Guttorm muitala, ahte prošeavttas lea ovttasbargu earáge eamiálbmogiiguin ja plánan leage lonohallat vásáhusaid iešguđetlágan museaid ja servodagaid gaskkal.
Prošeakta bistá jagi 2024 lohppii.
Yle Ođđasiid Sámis ja Beaivvi ságaid sáhtát maid guldalit Yle Areenas.