Sámegielddainge lea jagi loahpa guvlui koronadilli vearránan nugo earáge guovllus Suomas ja Davviriikkain. Yle Sápmi lea jearran gielddain, mo dat leat ordnen boahkuhandilálašvuođaid loahppa jagi áigge.
Anára gielddarabasfuolahusa hoavda Mirja Laiti muitala, ahte gielddas lágidit joavkoboahkuhandilálašvuođaid earret eará gaskavahku diibmu 8–11 Avvila dearvvasvuođaguovddážis ja maiddái duorastaga. Boahtte vahkus dilálašvuođat lágiduvvojit juohke beaivve.
Laiti namuha, ahte čoahkkananráddjehusat eai guoskka boahkuhandilálašvuođaid.
– Liikká ferte fuolahit, ahte olbmot eai gártta menddo guhká vuordit ja danin boahkuhandilálašvuođat lágiduvvojit ollu.
Laiti muitala, ahte joavkoboahkuhandilálašvuođaide ožžot boahtit buohkat viežžat vuosttas, nuppi dahje goalmmát boahku.
– Joavkoboahkuhusaid lassin sáhttá maiddái várret sierra boahkuhanáiggi, muittuha Laiti.
Eanodagas boahkuhit odne – Ohcejogas ja Soađegilis eai lágit joavkuboahkuhandilálašvuođaid
Eanodagas lágidit Heahtá dearvvašvuođaguovddážis joavkoboahkuhadilálašvuođa odne maŋŋebárgga diibmu 12–14. Gieldda vástideaddji divššár Anneli Kultima muitala, ahte joavkoboahkuhandilálašvuođas lea vejolaš viežžat sihke vuosttas, nuppi dahje goalmmát boahku. Muđuid boahkuhussii beassá, go várre áiggi.
Ohcejoga gieldda dikšunbarggu hoavda Päivi Kontio muitala, ahte Ohcejogas eai bastte lágidit joavkoboahkuhandilálašvuođaid ovdal juovllaid. Sii guorahallet ášši dárkileabbot ođđajagimánus.
Soađegili gielddasge eai bastte vátna resurssaid dihte lágidit joavkoboahkuhandilálašvuođaid. Dearvvasvuođarávvehaga ossodatbuohccedivššár Marja Tuovinen muitala, ahte sii čuvvot ainge boares plána koronaboahkuhusaid ektui.
– Eamboge dárbbašat resurssaid čájánasváldimis ja koronabálgáid guorramis, dadjá Tuovinen.
Beaivvi ságaid ja Yle Ođđasiid Sámis sáhtát maid guldalit Yle Areenas.