Suoma sápmelaš spesiálagirjerádju lea čohkken dieđuid sin čoakkáldagain eanemus luoikkahuvvon girjjiin. Spesiálagirjerádjodikšu Tiina Mäntylä muitala, ahte bivnnuhamosiid joavkkus leat sihke eará gielain sámegillii jorgaluvvon mánáidgirjjit ja sámegillii čállojuvvon girjjit.
– Sámegillii jorgaluvvon girjjiid luoikkahemiin fuomáša, ahte seamma girjjit beroštahttet go mat suomagielat mánáidgirjjiid bealde leat eanemus bivnnuhat, čilge Mäntylä.
Eanemus luoikkahuvvon girjjiid joavkkus sámegillii čállojuvvon mánáidgirjjiin leat Sunna Kitti Jiehtanasa iđit sihke Sissel Gaup ja Malle Remmel 15 lohkangirjjáža ráidu Ánin dánin táhppán siun.
_Jiehtanasa iđit -_sárggosráiddu vuođđun lea Feallán Ándde, Anders Fjellner epos Beaivvi bártni soakŋomátki Jiehtanasa máilbmái. Sunna Kitti lea ráhkadan iežas govvidusa joatkkan Feallán Ándde muitalussii.
Eará gielain sámegillii jorgaluvvon mánáidgirjjiin eanemus luoikkahuvvojit Jikŋon II Amas mu vuordá, Mauri Kunnas Beatnatluohká dálus, Aino Havukainen ja Sami Toivonen _Ommá ja Duommá beaiveruovttu_s sihke Jeff Kinney ráidogovvaromána Jierpmástalli beaivegirji.
Diktagirjji 69 čuoldda ja logemat jagi dassá almmuhuvvon anárašgielat bivttastangirjji luoikkahit ain
Čáppagirjjálašvuođa bealde viđanuppelot eanemus luoikkahuvvon girjji joavkkus lea Inger-Mari Aikio sámegielat diktagirji 69 čuoldda.
Diehtogirjjit dán listtus leat njeallje: Outi Pieski ja Eeva-Kristiina Harlin sáme- ja eaŋgalsgillii čállin Ládjogahpir, Ella Sarre duodjegirji Anarâš pivtâstem, Inger-Mari Aikio guovlohistorjágirji Buolbmatjávrri eallin ja Pekka Sammallahti Sámi-suoma-sámi sátnegirji.
– Erenoamáš dán listtus lea dát Anarâš pivtâstem, go jurddaša ahte dábálaččat anáraš- ja nuortalašgielat girjjiid luoikkaheaddjit leat unnán. Duddjonárbi ja bivttasteapmi orru beroštahttimin lohkkiid, ja dát girji lea juo ovddit jagiidge luoikkahuvvon dávjá, muitala Tiina Mäntylä.
Olbmot hálidit lohkat suomagillii Sámi eallimis
Lappi girjeráju sámečoakkáldat doallá sisttis girjjiid Ohcejoga, Eanodaga, Anára, Soađegili ja Roavvenjárgga girjerájuin. Eanemus luoikkahangearddit jagis 2021 leat čoggon Niillas Holmberg suomagielat románai Halla Helle.
– Dat lea min čoakkáldagas dál áidna girji, man luoikkahanvuoru gártá vuordit guhkit áigge. Dan ovdal almmustuvvan Kukka Ranta ja Jaana Kanninen girji sámeservodaga vásáhusain_Vastatuuleen_ lea nubbi girji, man luoikkahanvuoru lea gártan vuordit, dadjá Mäntylä.
Suomagillii čállojuvvon girjjit, mat oidnojit sámečoakkáldaga eanemus luoikkahuvvon girjjiid joavkkus, leat maid Heli Saarinen čállin historjágirji Sompion saamelaiset ja Niilo Aikio noveallačoakkáldaga goalmmát girji Niga 3.
Beaivvi ságaid ja Yle Ođđasiid Sámis sáhtát maid guldalit Yle Areenas.