Niillas Holmberg suomagielat romána Halla Helle almmustuvai vádjit jahki dassá Sámi álbmotbeaivve áiggiid. Dál Holmberg čállá seamma áigodagas muitalusa sámegillii, Halla Helle muitalusa nuppi geahččanguollus.
Dán jagis 2021 almmustuvvan girjji ii leat čálli mielas jierbmi jorgalit sámegillii, go son lea čállán dan suopmelaš nuorra albmá geahččanguovllus ja čála lea vuosttas persuvnnas.
Suomagielat románas Niillas Holmberg govvida kultuvrraid gaskasaš gulahallama. Girjji oaivilin lei olahit váldoálbmoga lohkkiid, ja nu dat leage dahkan.
Luoikkahanvuoru vuordimiin ferte leat gierdavaš
Girjerájuin gártá luoikkahanvuoru vuordit guhká, dát lea dilli nu Helssega gávpotgirjerájus go maiddái girjerájuid sámečoakkáldagas. Ovdamearkka dihtii oaivegávpotguovllus vurdet 662 luoikkaheaddji vuoruset lohkat Halla Helle.
Veardádallama dihte jagi 2021 Finlandia-bálkkašumi evttohasa, Rosa Liksom Väylä-girjji vuoru leat vuordimin 2 183 lohkki ja jagi 2020 Finlandia-vuoiti Anni Kytömäki girjji Margarita vurdet 1 223 lohkki.
Dán jagi loahpa girjevuovdinlisttuid ovtta bivnnuhis girjjis, Ilkka Remes čállin _Lohikäärmeen isku, _leat luoikkahanvuoru vuordimin 625 lohkki. Dieđut leat vižžojuvvon oaivegávpotguovllu gávpogiid oktasaš Helmet-girjebálvalusas.
Girjelágádus Gummerus lea hui duđavaš dainna, mo lohkkit leat vuostáiváldán girjji, ja maiddái vuovdinlogut leat buorit, dadjá lágádusjođiheaddji Anna Baijars.
– Girji lea vuvdojuvvon bures, vuostáváldin leamaš positiivalaš. Mii leat duođai movttegat čálli bealis ja goastideaddjin maid illudat menestumis.
Gummerus-fitnodagas muitalit, ahte Halla Helle lea vuvdojuvvon sullii 4300 stuhka. Dán logus leat deaddiluvvon girji bearpmaid gaskkas, jietnagirji ja e-girji.
Mediaid girjekritihkkáriin Halla Helle oaččui buriid árvvoštallamiid. Ovdamearkan Kirjaluotsi čállá, ahte Halla Helle lea nannosit servodatlaš romána. Dat gieđahallá máŋggabealagit sápmelaččaid sajádaga, guovddážis leat eandalii dánáigge hástalusat nu mo guolásteami ja eanageavaheami gáržžideamit ja ruossalasvuođat turismaealáhussas ja giellagažaldagain. Nuorat buolvva sápmelaččaid jietna dovdo dán grijjis.
Seamma árvvoštalli atná girjji nuppi dáfus váibadahttin, dakko gokko dat juohkása psykologalaš ja filosofalaš teoriijaide ja dulkomiidda.
Dál čálli juo bargá ovddosguvlui, sámegillii seamma fáttas
Niillas Holmberg lea movtta das, mo lohkkit leat váldán vuostá su suomagielat girjji. Álgohuša ja čavčča girjemárkaniid maŋŋá čakčadálvve bohte lasi buorit ođđasat.
Golggotmánus ageantafitnodat Helsinki Literary Agency vuvddii Halla Helle almmuhanrivttiid fránkariikalaš lágádussii ja dat mearkkaša girjji jorgaleami juo vuos fránskkagillii.
Juovlamánus bođii diehtu, ahte Halla Helle lea nammaduvvon dán jagi Runeberg-girjebálkkašumi evttohassan. Evttohassan leat guhtta romána, golbma diktačoakkaldaga ja okta essee-girji.
Niillas Holmberg ii ane dárbbašlažžan jorgalit Halla Helle -girjji sámegillii. Son baicce joatká fáttain nuppi geahččanguovllus, sámi oainnuin. Dan girjji son lea juo čállimin, sámegillii.
– Lean čállimin Elle, dan sámeoaivekarakteara geahččanguovllus, mii vuođđuduvvá dohko seamma áigodahkii, daningo dat geahččanguovlu addá fas midjiide sámegielat lohkkiide eambo go maid duot Halla Helle attášii jus dan jorgalivččii, čilge Holmberg.
Son ii ane veadjemeahttumin, ahte dat maid son dál čállá davvisámegillii, jorgaluvvošii suomagillii.
– Dashan livččii juo dange láhkái árvu go buot min olbmot eai loga sámegiela.
Go vuos jorgaluvvo fránskkagillii, de rahpá vejolašvuođaid jorgalit eará gielaidege
Jorgalanrivttiid vuovdin mearkkaša girjji beaggima dáfus ollu, árvala lágádusjođiheaddji Anna Baijars. Son lea maid čáppagirjjálašvuođa goastideaddji.
– Rivttiid vuovdimis lea stuorámus mearkkašupmi girječállái ja girjái, dat beassá ain eanet oidnosii ja juksá lasi lohkkiid. Besset oahpásmuvvát Sápmái, kultuvrii man eai ollugat Eurohpas dovdda. Praktihkas Éditions le seuil lea oastán rivttiid almmustahttit girjji Fránkariikkas fránskkagillii, diehtá Baijars.
Suomagielat girjjálašvuođa okta hástalusain laktasa gillii. Suomagielat girjegoastideaddjit máilmmis leat unnán. Goastideaddjit goittot hálidit ieža lohkat álgoteavstta dahje sii jorgalahttet osiid dakkár gillii man ieža áddejit.
Dálá dieđu mielde fránskkagielat jorgalus Halla Helle girjjis almmustuvvá jagis 2023.
Beaivvi ságaid ja Yle Ođđasiid Sámis sáhtát maid guldalit Yle Areenas.