Dán mánu loahpa bealde dáhpáhuvvá dakkár, mii ii leat goassige ovdal dáhpáhuvvan. Yle lágidan Ođđa musihka gilvu UMK láidestuvvo maid sámegillii, anáraš- ja davvisámegillii. Sámegielat láidesteame lea vejolaš čuovvut Yle Areena bokte.
Suoma stuorámus musihkkashowan rámiduvvon Ođđa musihka gilvu lea buot musihkadahkkiide rabas gilvvohallan, mas ohcet dan buoremus suopmelaš bihtá. Dat galgá dasto ovddastit Suoma maŋŋelabbos dán jagi Eurovision-lávlungilvvohallamis Torinos Itálias.
Sámegielat láidesteaddjit leaba Yle Sámi doaimmaheaddjit Heli Huovinen anárašgillii ja Linda Tammela davvisámegillii. Soai leaba lunddolaččat movtta dán vejolašvuođas beassat maid oaidnit dákkár stuorra dáhpáhusa ja mo dat lágiduvvo.
– Kommentáhtora barguhan lea dat, ahte mii čohkkát doppe studios ja guldalat ja geahččat dan show ja muitalat gehččiide váhá eambo dieđuid, dakkár lassidieđuid daid ovdanbuktimiin ja muđuige Ođđa musihka gilvvohallamis ja Euroviisuin ja nu ain.
– Dieđusge dál go mii bargat dan sámegillii, de munnos lea váhá seammás maid dakkár dulkabargu das, ahte muitalit mii doppe hállojuvvo suomagillii, dadjá doaimmaheaddji Heli Huovinen, gean dovdat maid Yle Sámi mánáid-tv Unna Junná buvttadeaddjin.
Ođđa musihka gilvu dollojuvvo Turkus Mátta-Suomas lávvardaga 26.2. diibmu 21.00. Televišuvnnas dát dáhpáhus lunddolaččat láidestuvvo suomagillii.
Yle prográmmabálvalusa Yle Areena bokte dat goit láidestuvvo maid sámegilli, čielggo suomagillii ja eaŋgals-, ruoŧa,- ja ruoššagillii.
Sámegiella heive buot doaimmaide
Doaimmaheaddji guovttos lohkaba váhá gealdagasas vuordit dán dilálašvuođa, muhto jáhkiba, ahte buot dat manná bures.
Dehálamos goit lea dál čájehit nu suopmelaččaide dego maid sápmelaččaide, ahte sámegiella sodjá vaikke makkár doaimmaide ja čilgengiellan sierralágan dáhpáhusaide. Heli Huovinen jáhkká, ahte dás lea stuorra mearkkašupmi.
– Sámegilli sáhttá maid rahkadit dákkár áššiid, sáhttá hállat mas beare, ahte eai leat dušše politihka dahje sápmelaččaide láktaseaddji áššit. Ja galgáge hállat sámegillii, dat lea midjiide árgabeaivi, dadjá doaimmaheaddji Heli Huovinen Anáris.
Nubbin láidesteaddjin nappo davvisámegillii gilvvohallamis lea muitaleamen Yle Sámi doaimmaheaddji Linda Tammela Helssegis. Maiddái su mielas lea dehálaš čájehit, ahte sámegiella heive masa beare.
– Mu mielas dat čájeha, man bures dat sámegiella heive man beare oktavuhtii ja ahte sámegiella lea ealli giella, man sáhttá geavahit iešguđetlágan oktavuođain ja vaikkoba dákkár guoimmuhanprográmmainge.
Beaivvi ságaid ja Yle Ođđasiid Sámis sáhtát maid guldalit Yle Areenas.