Musealágádusain lea dábálaš vurkenbarggu lassin dehálaš rolla juohkit dieđu ja oahpahit servoša. Dákkár barggu várás Sámemusea Siida lea bálkkáhan museapedagoga čatnat oktavuođaid olles sámeservošii.
Vuohččulaš Milla Pulska álggahii Sámemusea Siidda museapedagogan mannan čavčča. Museapedagoga ordne dáhpáhusaid ja fállá oahpu olles sámi servodahkii.
– Buvttán pedagogihka oainnu musea ođđa vuođđočájáhusa bargui ja ráhkadan maiddái pedagogihkkaplána museai ja ollašuhtán dan, muitala Pulska barggus birra.
Museapedagoga bargun lea ollašuhttit dakkár museadoaimmaid, maid vuođđojurddan lea buktit musea lagabui olbmo. Vuosttas bargun leamašan iešguđetlágan temábeivviid ordnen sámi servošii.
Boahttevaš vuođđočájáhusa oktavuhtii Pulska leage ovdamearkka dihte dahkamin oahppomateriála ja hárjehusaid iešguđet ahkásaččaide. Boahtteáiggis sin ulbmilin lea, ahte Sámemusea Siiddas šaddá deaivvadanbáiki, mas historjá šaddá ealásin dán áiggis.
– Dárkkuhus lea, ahte sámeservošat besset eanet leat museain ja besset oktavuhtii daidda boares dávviriidda. Dat eai leat dušše dávvirat, muhto buot muitalusat ja maid dat dárkkuhit olbmuide. Dasto go lea ođđa fiinna visti, nu lea vejolaš bovdet dohko olbmuid vaikko ovttastahttit soga ja sin dávviriid, čilge Pulska.
- Loga lasi: Sämimuseo Siida haalijd sierâdmáin čäittiđ párnáid mii lii museo – taan oho teeman lâi museonurâldâh
Museadoaibma johttá Sámi gilážiin
Sámemusea Siidda pedagogalaš plána sisttisdoallá earret eará mánáid ja nuoraid oassálastima musea doaimmaide, mas sii oahpásmuvvet ovdamearkka dihte dološ museagálvvuide.
Dál giđđat plánan lea johtit miehtá Sámi ja gulaskuddat sámeguovllu giliid olbmuin, ahte maid sii vurdet ja sávvet ođđa Sámemusea Siidda čájáhusain.
– Dál giđđat mii beassat johtit gilážiin ja jearrat olbmuin sin sávaldagain. Buot leat vejolaš, maid mii sáhttit dáppe ordnet, dadjá Pulska.
Beaivvi ságaid ja Yle Ođđasiid Sámis sáhtát maid guldalit Yle Areenas.