Sámi girkobeivviid lágidit Anára márkanis borgemánu álggus. Dán jagi leat hálidan váldit nuoraid vuhtii ain eanet ja danin nuoraide leat plánen ollu iešguđet doaimmaid ja suohtastallama. Das lea badjelaš logi jagi go Sámi girkobeivviid leat maŋimuš lágidan Anáris. Girkobeaivvit leat stuorra dáhpáhus ja dalle márkanis livžot gávttehasat.
Anára searvegotti nuoraidbargi Viivi Törmänen dadjá ahte ovddit jagiid máhcahaga vuođul nuoraide leat plánen sierra prográmma girkobeivviid várás vai nuoratge beasašedje oassálastit.
– Girkobeaivvit lea báiki, gos nuorat sáhttet deaivvadit nuppiideaset, Törmänen lohká.
Nuorade leat plánen earret eará tuvrra Bielbajávrri girkui, olgostohkosiid, nuoraidmeassu bargobáji, filmmaid ja ságastallandilálašvuođa, Törmänen logahallá. Olles nuoraidprográmma beasat guovlat Suoma evangelalaš-luteralaš girku neahttasiiddus.
Törmänen vuordá buot eanemus dan ahte beassá leat girkobeivviin mielde, go dás šaddá su vuosttas vásáhus girkobeivviin. Son jáhkká ahte nuorat gal beroštit searvat girkobeivviid nuoraid doaluide.
Sámenuorat besset deaivvadit nuppiideaset girkobeivviin
Sámenuorra Sáranne Näkkäläjärvi áigu oassálastit girkobeivviide ja čiŋadit gávttiin. Son lea pandemiijas váillahan buot eanemus deaivvadit sámenuoraiguin.
– Mun vuorddán ollu olbmuid. Sávan ahte doppe leat ollu nuorat ja beasan singuin háleštit, son muitala.
Näkkäläjärvi máinnaša ahte áigu mannat geahččat girkobeivviid nuoraidkonseartta.
Kántor Jari Linjama lea mielde lágideamen girkobeivviid. Son muitala ahte girkobeivviid prográmma lea dál jo gárvvis ja dán jagi olbmot besset gullat iešguđetlágan musihka.
– Doppe lea ođđa sálbmaskearru konsearta. Vaikko dat leage sálbmakonsearta, de dat lea áibbas albma musihkka olles konsearta, vaikko nuohtat leat sálmmat.
Linjama muitala ahte girkobeivviin lágidit dábálaš ipmilbálvalusaid lassin maiddái ekumenalaš ipmilbálvalusa ja nuoraid ipmilbálvalusa.
Viđát Sámi girkobeivviid lágidit Anáris borgemánu 5.–7. beivviid. Girkobeaivvit čohkkejit oktii máŋgga buolvva sámiid lávlut árbevirolaš sálmmaid, searvat ipmilbálvalusaide ja čuovvut semináraid.
Sámi girkobeivviid ordnejit Suoma evangelalaš-luteralaš girku sámebarggu ráđđádallangoddi, Sámi girkoráđit Norgga ja Ruoŧa girkus, Oulu bismagoddi, Anára searvegoddi ja Oulu ortodoksalaš bismagoddi.
Beaivvi ságaid ja Yle Ođđasiid Sámis sáhtát maid guldalit Yle Areenas.