Olles Eurohpa, Israel ja Austrália leat dál ráhkkaneamin Eurovišuvdna-musihkkagilvui, man vuosttas semifinála lea miessemánu 10. beaivve. Eurovišudna ordnejuvvo dán jagi Itálias, Torino gávpogis, go diibmá gilvvu vuittii itálialaš rock-joavku Måneskin.
Suomas Eurovišuvdna-dovdu álgá Viisukupla dahjege Eurovisionsbubblan -nammasaš guovttegielat tv-prográmmain, mas guossepanelisttat, Suoma eurovišuvdnalágideaddjit ja áššedovdit gehččet buot riikkaid ovddasteddjiid ovdanbuktimiid. Sin bargun lea árvvoštallat bihtáid ja ovdanbuktima.
Guossepanelistan leat dán jagi artisttat Petra Laiti, Hanna Pakarinen, Paul Elias, Robin ja BESS. Tv-prográmmas leat oktiibuot njeallje oasi, main golmmas leat panelisttat vurrolagaid ja njealjádis tv-gehččiid sávaldagat.
– Mun lean fárus de ovtta panelas, ja mun lean čohkkán doppe studios ja addán iežan oaiviliid sullii goalmmát oassái Eurovision-bihtáin. Hirbmat somás vásáhus gal, muitala Petra Laiti.
Gielaid máŋggabealatvuohta berrešii gullot
Vuosttas ášši masa Laiti gidde fuomášumi gilvobihtáid guldalettiin lea giella. Son atná árvvus dan, jus bihttá lávlojuvvo artistta iežas eatnigillii.
– Liikon dasa, ahte gielaid máŋggabealatvuohta gullo. Gidden fuomášumi maiddái dasa, makkár šuoŋaid bihtás geavahit ja bohtetgo vaikke muhtin čuojanasat dan dihto guovllus. Árvvoštalan maid dan, makkár show dan bihtá birra sáhttá hukset ja mo dat heive stuorra lávddi ala, lohká Petra Laiti.
Jo máŋggaid logiid jagiid eaŋgasgiella lea šaddan váldo lávlungiellan Eurovišuvnnain, vaikke muhtin earágielat bihtát maid álo leamaš mielde. Diimmá vuoiti Måneskin bihttá Zitti e buoni lea itáliagillii. Petra Laiti árvala, ahte iežas gillii lávlun šaddáge dál treandan.
– Eandaliige dán jagi leat hui olu eaŋgasgielat bihtát, namalassii balládat. Eaŋgasgielat bihtát birgejit gal dain báikkálaš gilvvuin, muhto dat veahkehit loktet daid bihtáid, mat leat iežaset gillii lávlojuvvon. Iežas gillii lávlun lea givrodat, dat buktá juoidá eambo dan gilvui, oaivvilda Laiti.
Servodatlaš áššit vuhttojit Eurovišuvnnain
Vaikke lea musihkkagilvvus sáhka, de máilmmi dilli čuovvu lunddolaččat maiddái musihkkii.
Guovvamánu loahpas Eurohpa ráffi cuovkanii, go Ruošša fallehii Ukraina. Ruošša álggahan soahti lea bistán jo farga guokte mánu ja lea dagahan stuorra humanisttalaš kriisa Ukrainas. Oktan ráŋggáštussan Ruššii Eurovišuvnnaid lágideaddjiorganisašuvdna EBU lea bálkestan Ruošša eret Eurovišuvnnain.
Petra Laiti ieš sávvá Ukraina vuoittu dán jagáš Eurovišuvnnain. Son jáhkká, ahte lávddi alde bohtet čájehit doarjaga Ukrainai iešguđetláhkai.
– Eurohpa dilli oidno dain bihtáin, doppe leat ráfi ávžžuhusat. Jáhkán mii boahtit oaidnit doppe gilvvuin symbolalaš dagu Ukraina dili ektui. Eurovišuvnnain lea guhkes historjjá dainna ahte váldit vuhtii eurohpalaš konflivttaid, muitala Laiti.
Viisukupla - Eurovisionsbubblan álgá lávvardaga Yle TV1:žis diibmu 21.25 ja Yle Areenas.
Beaivvi ságaid ja Yle Ođđasiid Sámis sáhtát maid guldalit Yle Areenas.