Eiseváldi lea váruhan alla dulvvis mii sáhttá dagahit maid vahágiid dán miessemánu maŋimuš beivviid.
Ealáhus-, johtalus- ja birasguovddáš dieđihii 24.5. ahte ovdamearkan Ovnnesjogas dálkki liegganeapmi lokte čázedási juo nuppádassii dán giđa.
Rádjeeanuid, Durdnoseanu, Muoniojoga ja Deanu čáhci lea alimus muttus Urbánvahku loahpas dahje miessemánu moatti maŋimuš beaivve, árvalit birasguovddážis.
EJB-guovddáža mielde lea vejolaš ahte Muoniojohka dulvá vel nu ahte čáhci loktana Suoma ja Ruoŧa gaskasaš rádjageainnu ala.
Ovadamearkan Gárasavvonis guokte jagi dassá čáhci loktanii Suoma-Ruoŧa geainnu ala ja botkii muhtin áigái oasi johtalusas.
Dán giđa jieŋat Muoniojogas ja das badjelis johttájedje sotnabeaivve 22.5.
– Dilli duoin jogain orru leamen vel oalle ráfálaš ja lea váttis jáhkkit alla dulvái, dadjá Anja-Riitta Oja-Kotavuopio, geainna Yle Sápmi ságastalai maŋŋebárgga 24.5. eahkedis. Liekkas lei dalle 19 ceahki.
Oja-Kotavuopio bearaš ássá Gárasavvonis áibbas Muoniojoga gáttis. Gaskavahko son muitalii ahte Urbánijas čáhci loktanii Gárasavvonis guokte goartila, sullii 30 sentte.
Nuortelabbos, Avviljogas ja Giemajogas dulvi leamaš juo alimus dásis. Doppe dulvečáhci ii loktanan erenomaš bajas. Avviljogasge sáhttá dulvat vel nuppádassii muhto dat ii mana seamma bajás go giđa vuosttas dulvi.
Anja-Riitta Oja-Kotavuopio diehtá ahte go leat ná liehmut de galhan dat sáhttá vel loktet čázi. Su mielas goittot rádjaeanu gierragiin ii orošii leamen nu ollu muohta ahte dan suddan loktešii čázi olu.
– Leahan dat somá go lea liekkas. Dáppe olbmot juo leabuheamet geahčadit joga guvlui ahte goas dal aitto beassá luossabivdui, meahce guvlui ii šat geahča oktage, govvida son olbmuid ráhkkaneami geassái Gárasavvonis.
Beaivvi ságaid ja Yle Ođđasiid Sámis sáhtát maid guldalit Yle Areenas.