Eamiálbmogiid musihkkafestivála Ijahis idja loahpaha Sámi geasi, dego juo láve. Dán jagáš Ijahis idja lágiduvvo Anáris 19.-20.8.2022.
Festivála buvttadeaddji Oula Guttorm lohká, ahte plánemiin leat ovdánan dábálaš áigetávvála mielde. Diibmá festiválas báhce buorit dovddut ja vaikko festivála leige pandemiijadili dihte ovttabeaivásaš, liikká dat lei bivnnut.
– Buorre mielain mii dieđusge ordnet dáhpáhusa. Miihan oinniimet mannan gease, ahte go mis lei ovttabeaivásaš dáhpáhus, de dathan lei iešalddes bivnnuhamos ovttaskas festiválabeaivi, mii goassege leamašan, illuda Guttorm.
Buvttadeaddji lohpida festivála olles prográmma almmuheami suoidnemánu álgui. Ovdal dan almmustahttit vel muhtin artisttaid, geat bohtet festiválii ovdanbuktit.
Ijahis idja lea almmustahttán dán radjái ovtta musihkkajoavkku dán jahkái: legendaralaš sámi rockbánda Intrigue. Intrigue lea Ijahis ija lávvordateahkeda váldoartista.
Guttorm jáhkká, ahte olbmuid festiválamokta lea badjin.
– Jáhkán, ahte olbmot maiddái dán gease leat háliideamen boahtit festiválii ja festiválaide oppalohkái, ahte lea olbmuin miella vuolgit dáhpáhusaide. Dien dáfus mis lea gal buorre dovdu Ijahis ija ektui.
Beaivvi ságaid ja Yle Ođđasiid Sámis sáhtát maid guldalit Yle Areenas.