Hââʹdd lie pâjjnam mõõnni määnpõõʹji ääiʹj da tät vaikkat puäʒʒtallu še.
Inflaatio lij pâjjnam ǩieʹssmannust 7,8 proseeʹnt. Jeänmõsân tõt kuâsttai energiaouddsin mâʹte puäʹlddemaunnsin. Nuʹtt še tieʹǧǧ ärvv lij njeiddam da puäʒʒhååidast tõt miârkkšââvv, što tieʹǧǧ ij teänab riʹjtte seämmanalla. Puäʹlddemaunnsi hõõʹddi pâjjnummuš lij jõnn lââʹsskooll jiânnai liikkeei puäʒʒhoiddu.
Puäʒʒoummu âʹnne ǩeâlkaid da aautid jååttmõʹšše. Sääʹmjânnmest lie kuʹǩes kõõsk juʹn õõut paalǥâskååʹdd seʹst da puäʒʒoummu feʹrttje jååʹtted jiânnai mieʹccest. Måtmest õõlǥči še jieʹlled raajjvuuʹdest viǯǯmen puõccuid.
Paalǥâskooʹddi õhttõõzz väärrsaaǥǥtuõʹllʼjeei Tiina Sanila-Aikio ij võl silttâd särnnad, måkam vaikktõs inflaatiost lij puõccuvueʹǯǯ ǩilohâdda.
– De jõs feʹrttai porrmõõžž vuäʹstted puõccuid, nuʹtt teâđast tõid feʹrttai puʹhtted tiiʹǩ Kõskk- leʹbe Saujj-Lääʹddjânnmest da ouddmiârkkân suõiʹni hâdda puäʹtte frahttmääus võl ool, särnn Sanila-Aikio.
Puõccuvueʹǯǯ ǩilohâʹdd ij vueiʹt tän vueʹjjest čuuʹt jiânnai pâjjned, što oummu tõn veâl vuäʹstte
Veär hââʹdd lie pâjjnam ǩieʹssmannust 10,9 proseeʹnt, mii lij jeänab ǥu takai hõõʹddi pâjjnummuš. Veärraunnsin hõõʹddi pâjjnummuš kuâsttai jeänmõsân kueʹl da kaaʹff hõõʹddin.
Puäʒʒoummu tuâj lââʹzzte ǩilohââʹdd ij-ǥa puäʒʒvueʹǯǯ leäkku nuʹt jiânnai kaaupšemnalla pueʹtti čõõuč.
– Õhtt nääʹll lij lââʹzzted ǩilohâdda måtam euʹrrmeäʹr. Leâša teʹl feʹrttai smiõttâd, što vuäʹstte-a oummu puõccuvueʹǯǯ teänab, jõs tõt lij čuuʹt hâddai. Kâʹl tõʹst še puätt raajj vuâstta, Sanila-Aikio smeâtt nuuʹbbnallšem määin.
Puõccuvueʹǯǯ kaaupšummša vaaikat, što måkam äärv oummu ouʹdde pääiklaž vuâǯǯa tõn sââʹjest, što oummu vuästče pâi määʹrf kaaupâst.
Sanila-Aikio tuäivv, što oummu ouʹdde äärv puõccuvuâǯǯa.
– Teâđam, što tõt lij šiõǥǥ smakksaž da tiõrvvsallaš, jõs verddõõllâp ouddmiârkkân kuuzz- leʹbe šââʹjjvuâǯǯa. Imago, kååʹtt puõccust lij, de mon ååskam tõt vieʹǩǩat tõʹst ooudårra. De meeʹst lie jiânnai ålggjânnamneeʹǩǩ, turiist, kook puäʹtte Lääʹddjânnma da sij haaʹlee njâʹdsted puõccuvueʹǯǯ, nõmmad Sanila-Aikio.
