Inflaatio lasanij vuod kesimáánust, tääl Suomâst loho lii jo 7,8%. Inflaatio uáivild hoodij tivrom já tom, et siämmáin ruuđáin jieh pyevti uástiđ siämmáá ennuv ko ovdil.
Ovdâmerkkân moonnâm juovlâmáánu rääjist diesel já bensin hadde lii paijanâm 42 % já šleđgâ 22 %.
Meiddei purrâmâš lii tivrom. Kyele hadde lii masa kyevtkiärdásâš. Jáávuh, suurameh já maneh láá tivrom paijeel 30 % ihepeeleest.
Taat piäjá ulmuid smiettâđ maid taarbâš já keččâđ meid hoddijd. Nuuvt toohâv meid Njellimliih Leena Saijets já Tauno Haltta.
Haltta ij jyehi peeivi ele Avelist käävpist, mut ij sun kal áigu niälguđkin, veik puoh tivroh. Sun osko et taat tivrom meid juátkoo.
– Jiem ááigu kuittâg purrâmušâst šeštiđ, kal čuávji kalga leđe oornigist já juurbâs, muštâl Haltta.
Sun meid leeihâš, et taat äigi piäjá miäcástiđ já kuálástiđ syele, ko puoh tivroh.
– Toh taheh taah korrâ hadeh, et lii pággu porgâđ maidnii lovettem-uv, smiättá Haltta já moijáá.
Saijets lii kepidâm autoin vyeijim, ige uásti tievâshoddijn käähvi
Saijets lii kepidâm tušše vyeijim já kiáččá moh láá.
– Kähvi lii taggaar, et kalga leđe hälbi, jiem oleshadde käähvi uásti, iätá Saijets.
Tääl lâi Saijets pággu puáttiđ Avelân jieijâs autoin, ko lyemeäigi aldan ja bensin nuvâškuođij autost.
– Jieht eellim kal pyeráin jeegist, muštâl Saijets.
Táválávt sun iälá ohtii ohhoost käävpist.
Kuldâl lase anarâš saavâid tääbbin.