Boahtte vahku loahpas Anára márkan nuppástuvvá, go Sajosa šilljui ceagganit Sámi girkobeivviid lávut ja girkobeaiguossit livžžodit iešguđet dáhpáhusaid čuovvumin.
Stuorra girkobeailávus lágiduvvojit golbma seminára, main vuosttas lea bearjadaga diibmu 15.00–16.30. Seminára láidesteaddjin lea Tore Johnsen, guhte bargá amanueansan Girkolaš skuvlenguovddážis Romssas.
Vuosttas seminára fáddán lea "Sámeeatnama luondduguovllut kristtalašvuohta". Semináras gieđahallet sámiid árgabeaikristtalašvuođa ja dan mearkkašumi, muitala girku sámebarggu čálli Erva Niittyvuopio.
– Johnsen lea leamašan álggu rájes fárus Sámi girkobeivviin, go daid lágidedje vuosttas háve Johkamohkis 2004, Niittyvuopio dadjá.
Niittyvuopio muitala, ahte Johnsen lea iežas doavttirgráđa dutkamuššii jearahallan olbmuid Finnmárkkus. Jearahallamiin son čielggadii earret eará dan, makkár lea árgabeaivvi kristtalašvuohta sámiid ealliimis ja makkár árbevierut ja muitalusat dasa gullet.
Lávvardaga leat fállun guokte iešguđet seminára
Lávvardaga vuosttas semináras diibmu 14 ovddos guvlui hállá dutki ja oahpaheaddji Lovisa Mienna Sjöberg. Seminára fáddá lea "sivdnideamis sivdnideapmái".
– Lovisa ieš lea čilgen go letne čálašan, ahte makkár lea olbmo sadji sivdnádusas ja mo olmmoš ieš oaidná ja ádde sajis sivdnádusas, čilge Erva Niittyvuopio seminára fáttá.
Nubbi lávvardaga seminárain álgá diibmu 16, ja dan fáddán lea sápmelaččaid iešsoardimiid eastadeapmi. Dan birra hállaba Jon Petter Stoor ja Heidi Eriksen.
Stoor leamašan jođiheamen prošeaktajoavkku, mii ráhkadii davviriikkalaš sámiid iešsoardimiid eastadanplána jagis 2017. Eriksen fas lea gielddadoavttirin Ohcejoga dearvvasvuođaguovddážis ja son bargá maiddái Sámiid psykososiálalaš doarjjaossodaga fidnohoavdan.
Seminára ordnema váldoovddasvástádus lea Sámi Soster rs:s, muitala Niittyvuopio. Ieš seminára fáttás son lea háleštan Erikseniin.
– Son hálai dan birra olu go iešsoardin lea min álbmoga gaskkas hui hálakeahtes ášši, dat sáhttá vehá suollemas áššin ja noađđin lagamužžaide, Niittyvuopio lohká.
Semináras smihttet earret eará dan, mo váttes áššiin sáhtášii hállat ja mo daid sáhtášii buktit ovdan.
– Maiddái dan dihtii ahte sáhtášii dasto dakkár jurdagiid bissehit, Niittyvuopio muittuha.
Psykososiálalaš doarjaga fállet lávvardaga Sajosis
Geassemánus rahppon Sámiid psykososiálalaš doarjjaovttadaga bargit bálvalit Sámi girkobeivviin lávvardaga borgemánu 6. beaivvi Sajosis.
– Lea dehálaš go mis leat lossa fáttát, de lea dat psykososiálalaš doarjaga joavku doppe lávvardaga, jus bohciidit jurdagat dahje moraš miella de singuin sáhttá dasto háleštit, Niittyvuopio rávvesta.
Oassálastiid girkobeivviide vurdet 350–500 nu mo dábálaččat lávejit. Stuorrá lávvui galggašedje šiehttat buohkat, geat leat beroštuvvan čuovvut semináraid.
– Dat lea beare boahtit stuorra girkobeailávvui sisa, dohko čáhket sullii 500 olbmot čohkkát ja guldalit, buresboahtin buot semináraide, dadjá girku sámebarggu čálli Erva Niittyvuopio
Sámi girkobeivviid lágidit Anáris 5.–7.8.2022. Girkobeivviid prográmma gávnnat Suoma evangelalaš-luteralaš girku neahttasiiddus. Girkobeivviid prográmmii oassálastin lea nuvttá, iige dáhpáhussii dárbbaš sierra almmuhit.
Beaivvi ságaid ja Yle Ođđasiid Sámis sáhtát maid guldalit Yle Areenas.