Mannan vahkkoloahpa musihkkafestivála Ijahis idja čohkkii gávttehasaid Anára márkanii. Festiválaguossit ledje čiŋadan iešguđetlágan gávttiiguin.
Máŋgasa gáktái dahje dasa gullevaš oasážiidda laktása vel mávssolaš muitu dahje muitalusge. Ovdamearkka dihte Mikael Hætta lea árben rohkiid ádjástis ja danin dat leat sutnje mávssolaččat.
– Dát leat mu ádjá roahkit nu ahte dat mearkkašit ollu munnje, son lohká.
Dasa lassin maiddái gáktediŋga sáhttá leat gávtti buoremus oassi.
– Dát lea čuvgesrukses gákti de buot lea mu miela mielde, čaimmiha Elle Raudasoja.
Petteri Feodoroffges lea liikostan gávttis bearalhearvvaide. Bures gorrojuvvon soaját fas ledje Ánte Veijola miela mielde.
– Várra dát soaját, dat leat bures ráhkaduvvon, dadjá Ánte Veijola.
Yle Sápmi lea Ijahis idja -festivála ovttasbargoguoibmi.
Beaivvi ságaid ja Yle Ođđasiid Sámis sáhtát maid guldalit Yle Areenas.